Prashant Koratkar : कोरटकरचे राजकीय कनेक्शन कोणासोबत? भाजपच्या पदाधिकाऱ्यांची अडचण

Nagpur News : इतिहासकार इंद्रजित सावंत यांना धमकी देणारा प्रशांत कोरटकर याच्या समोरील अडचणीत आणखी वाढ झाली आहे. त्याच्या विरोधात नागपूरच्या बेलतरोडी पोलिस ठाण्यात गुन्हा दाखल करण्यात आला आहे.

ते नॉट रिचेबल असताना त्याची मुलगी आणि आईला जीव मारण्याची धमकी देण्यात आल्याने त्यासुद्धा पोलिस ठाण्यात पोचल्या आहेत. हा संवेदनशील होत चालला असल्याने कोरटकरचे राजकीय कनेक्शनही तपासले जात आहे.

सावंत आणि कोरटकर प्रकरण सध्या राज्यात चांगलेच तापले आहे. कोरटकर याने सावंत यांना धमकावताना अश्लील भाषेत शिवीगाळ केली. एवढेच नव्हे तर त्याने छत्रपतींबाबत अपशब्द वापरले. त्यामुळे संतापाची लाट निर्माण झाली आहे. कोरटकरच्या अटकेसाठी आंदोलने केली जात आहे. राजे मुधोजी भोसले यांच्या नेतृत्वात मराठा समाजाच्या प्रतिनिधींनी कोरटकरच्या विरोधात आंदोलन केले. शुक्रवारी रात्री शिष्टमंडळ बेलतरोडी पोलिस (Police) ठाण्यात पोचले होते. त्यानंतर रात्री उशिरा कोरटकर याच्यावर गुन्हा दाखल करण्यात आला.

कोल्हापूर येथे तक्रार दाखल केल्यापासून प्रशांत कोरटकर नागपुरातून (Nagpur) गायब झाला आहे. तो शेजारच्या मध्य प्रदेशातील बालाघाट जिल्ह्यात असल्याचे तोंडी सांगण्यात येते. मात्र पोलिसांना अद्याप तो सापडलेला नाही. कोरटकर याचे भाजपच्या काही नेत्यांसोबत संबंध होते. विशेषतः आपीएस अधिकाऱ्यांसोबत त्याची चांगलीच जवळीक होती. कुठल्याही आयपीएस अधिकाऱ्याची बदली, बढती झाली की तो त्यांना हमखास भेटायला जायचा. फोटो काढून फेसबुकवर व्हायरला करायचा. अधिकाऱ्यांसोबतचे फोटो आणि जवळीक दाखवून तो आपली कामे काढून घेत असल्याची चर्चा आहे. त्यामुळे त्याचे राजकीय कनेक्शन तपासल्या जात आहे.

काँग्रेसचे विधिमंडळाचे नेते विजय वडेट्टीवार यांनी छत्रपतींचा अपमान केल्यानंतरही कोरटकरच्या विरोधात भाजपचा एकही आंदोलन करीत नाही, निषेध नोंदवत नाही याकडे लक्ष वेधले. या माध्यमातून त्यांनी भाजपवरही निशाणा साधला आहे. या माध्यमातून त्यांनी कोरटकर आणि भाजपचे संबंध सूचित केले आहे. एरवी सर्वच विषयावर बोलणारे आणि प्रतिक्रिया देणारे भाजपचे प्रदेशाध्यक्ष चंद्रशखेर बावनकुळे हेसुद्धा अद्याप एकही शब्द याबाबत बोलले नाहीत.

पोलिस तपास करीत आहे एवढेच भाजपचे नेते सांगून या विषयावर बोलण्याचे टाळत आहे. कोरटकरमुळे भाजपाच्या पदाधिकाऱ्यांचीसुद्धा अडचण झाली असल्याचे यातून दिसून येते. प्रशांत कोरटकर यांची मुलगी पल्लवी आणि आई यांना सुद्धा जीवे मारण्याची धमकी येत असल्याने त्यांनी इंद्रजित सावंत यांच्या विरोधात गुन्हा दाखल करावा, अशी मागणी पोलिसांकडे केली आहे.