Nagpur BJP politics : बाहेरून आलेल्यांना आमच्या छातीवर का बसवता? भाजपचे माजी आमदार पारवे संतापले

Maharashtra BJP : उमरेड विधानसभा मतदारसंघात भाजपचे माजी आमदार सुधीर पारवे आणि माजी आमदार राजू पारवे यांच्यात पुन्हा वाद पेटला आहे. जिल्ह्याच्या कार्यकारिणीत राजू पारवे यांना झुकते माप दिल्याने सुधीर पारवे चांगलेच संतापले आहेत. त्यांनी थेट भाजपचे माजी प्रदेशाध्यक्ष चंद्रशेखर बावनकुळे यांना पत्र पाठवून आपला राग व्यक्त केला.

सोबतच जुन्या लोकांच्या छातीवर बाहेरून आलेल्या बसवल्या जात असल्याचा त्यांनी आरोप केला. भाजपमध्ये मोठ्या प्रमाणात इनकमिंग होत आहे. हे करताना जुन्या कार्यकर्त्यांकडे लक्ष देण्यासाठी नवा सेल निर्माण करावा असा सल्लाही त्यांनी पक्षाला दिला.

सुधीर पारवे उमरेड विधानसभा मतदारसंघाचे दोन वेळा आमदार होते. काँग्रेसच्या (Congress) राजू पारवे यांनी त्यांचा पराभव केला. लोकसभेची निवडणूक महायुतीकडून लढलेले राजू पारवे पराभूत झाल्यानंतर भाजपमध्ये आले. त्यांनी उमरेड विधानसभा मतदारसंघावर दावा केला होता. त्याचवेळी सुधीर पारवे यांनी राजू पारवे यांच्या पक्ष प्रवेशाला विरोध केला होता.

दोन पारवे यांच्या वादामुळे विधानसभेची उमेदवारी अनेक दिवस रोखून ठेवण्यात आली होती. शेवटच्याक्षणी सुधीर पारवे यांना उमेदवारी देण्यात आली. मात्र ते पुन्हा पराभूत झाले. आता दोन्ही पारवे एकाच पक्षात असल्याने आणखीच वाद वाढले आहेत. भाजपची (BJP) जिल्हा कार्यकारिणी जाहीर होताच सुधीर पारवे पुन्हा भडकले आहेत.

जुन्या कार्यकर्त्यांचा विचार कोण करणार असा सवाल त्यांनी केला आहे. उद्या गुरुवारी मुंबई येथे प्रदेशाध्यक्ष आणि मुख्यमंत्री यांच्यापुढे आपण आपल्या भावना मांडणार असल्याचे त्यांनी सांगितले. मागील काही काळापासून भाजपमध्ये इनकमिंगचे प्रमाण वाढले आहे. त्यामुळे अनेक जुन्या कार्यकर्त्यांमध्ये हातातील संधी हिरावली जात आहे.

परंतु पक्षशिस्तीमुळे ही सल कोणी सार्वजनिकपणे बोलून दाखवत नाही. मी भारतीय जनता पक्षाचा एक निष्ठावान कार्यकर्ता आणि माजी आमदार म्हणून सलग दहा वर्षे जनतेची सेवा केली.

पक्षाच्या उभारण्यात ज्यांनी दिवस रात्र झिजून घाम गाळला, त्या जुन्या आणि सामान्य कार्यकर्त्यांचा विचार करण्याची आवश्यकता आहे. मी आपल्यासह जुन्या कार्यकर्त्यांच्या भावना चंद्रशेखर बावनकुळे यांना पत्र लिहून मांडल्या असल्याचे सुधीर पारवे यांनी सांगितले. भाजपमध्ये मोठ्या प्रमाणात पक्षप्रवेश सुरू आहेत. बाहेरच्यांना मोठमोठी पदे खूश ठेवले जात आहे. त्यामुळे निष्ठावंत कार्यकर्त्यांमध्ये मोठी अस्वस्थता निर्माण झाली असल्याचे दिसून येते.