Nagpur News, 30 Dec : नागपूर महापालिका निवडणुकीसाठी सोमवारी मध्यरात्री भाजप आणि शिवसेनेच्या युतीवर शिक्कामोर्तब करण्यात आले. शिंदेंच्या शिवसेनेची 151 पैकी फक्त आठ जागा देऊन बोळवण करण्यात आली आहे. हे करीत असताना शिवसेनेच्या कोट्यातील पाच जागाही भाजपने आपल्या कार्यकर्त्यांसाठी राखीव ठेवल्या आहेत.
फक्त त्यांच्या हाती कमळ ऐवजी धनुष्यबाण दिला जाणार आहे. हे बघता शिवसैनिकांच्या वाट्याला फक्त तीन जागा आल्या आहेत. यामुळे शिंदेसेनेत मोठा असंतोष निर्माण झाला आहे. नागपूर महापालिकेत भाजप आणि शिवसेनेची युती तुटण्याची दाट शक्यता निर्माण झाली होती. शिवसेनेच्यावतीने ५० जागा देण्याचा प्रस्ताव भाजपला देण्यात आला होता.
मात्र भाजपने हा प्रस्ताव फेटाळून लावला. फक्त पाच जागा सोडण्याची तयारी दर्शवली. मात्र शिवसेनेने यासाठी नकार दिला होता. सोमवारी रात्री नितीन गडकरी यांच्या घरी पुन्हा एकदा भाजप आणि शिंदेसेनेच्या प्रमुख पदाधिकारी यांची बैठक झाली. यात शवसेनेला आठ जागांवर राजी करण्यात भाजपला यश आले.
प्रभाग क्रमांक 3 आणि 5 यातील एक जागा शिंदे सेनेला सोडण्यात आली. प्रभाग क्रमांक 7,9, 31,30 आणि 24 यातील एक एक जागा शिंदे सेनेला देण्यात येणार आहे. मात्र येथे शिवसेनेच्या धनुष्यबाण घेऊन भाजपचे कार्यकर्ते लढणार असल्याचे समजते. ही नावे दुपारी बारा वाजता जाहीर केली जाणार आहेत. या युती नंतर कोणीही बंडखोरांना एबी फॉर्म देणार आहे. असे ठरवण्यात आले.
शिवसेनेच्या वतीने आमदार कृपाल तुमाने, पूर्व विदर्भाचे संघटक किरण पांडव, शहर प्रमुख सूरज गोजे यांनी बोलणी केली. तत्पूर्वी, शिवसेनेच्या उमेदवारांची नावे आणि त्यांच्या प्रभागाची यादीत भाजपचे निवडणूक प्रभारी आमदार प्रवीण दटके यांच्याकडे सोपवली होती. हा प्रस्ताव भाजपने फेटाळून लावल्यानंतर २० जागा सोडाव्या अशी मागणी शिवसेनेच्यावतीने करण्यात आली होती. मात्र त्यालाही भाजपने नकार दिला. त्यानंतर दोन्ही पक्षातील नेत्यांचा संवाद बंद झाला.
भाजपने पाच जागा देण्याची तयारी दर्शवल्याचे समजते. मात्र शिवसैनिकांनी यापेक्षा स्वबळावर लढावे असा आग्रह धरला आहे. सोमवारी शिवसेनेसोबत बोलणी न करताच भाजपने आपल्या उमेदवारांना एबी फॉर्मचे वाटप सुरू केले होते. त्यामुळे शिवसेनेच्या युतीच्या आशा मावळल्या होत्या. दुसरीकडे ठाकरेंची शिवसेना आणि शरद पवार यांच्या राष्ट्रवादीला प्रत्येकी १२ ते १५ जागा देऊन काँग्रेसने आघाडी कायम ठेवली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.