NCP Politics : राष्ट्रवादी काँग्रेसचा नवा जिल्हाध्यक्ष ठरला? आता फक्त नियुक्ती पत्राचीच प्रतीक्षा

Nagpur News : राष्ट्रवादी काँग्रेसचे नागपूर ग्रामीणचे जिल्हाध्यक्ष बाबा गुजर यांनी तडकाफडकी अध्यक्षपदाचा राजीनामा दिला आहे. त्यामुळे नवा अध्यक्ष कोण याकडे सर्वांचे लक्ष लागले आहे. यात राजाभाऊ टाकसाळे यांचे नाव सध्या आघाडीवर आहेत. त्यांचे अभिनंदनही केले जात आहे. टाकसाळे यांनीसुद्धा यास दुजोरा दिला असला तरी पत्र हाती येऊ द्या असे त्यांचे म्हणणे आहे.

बाबा गुजर आठ वर्षांपासून राष्ट्रवादी काँग्रेसचे अध्यक्ष होते. तीन दिवसांपूर्वी नागपूरमध्ये राष्ट्रवादी काँग्रेसचे चिंतन शिबिर पार पडले. राष्ट्रवादीचे राष्ट्रीय अध्यक्ष तसेच उपमुख्यमंत्री अजित पवार, राष्ट्रीय कार्याध्यक्ष खासदार प्रफुल पटेल, प्रदेशाध्यक्ष सुनील तटकरे यांच्यापासून सर्व मंत्री, खासदार, आमदारांसह सुमारे साडेपाचशे प्रमुख पदाधिकारी या शिबिरात सहभागी झाले होते.

या शिबिरात प्रफुल पटेल यांनी काही नियुक्त्यांवर जाहीरपणे नाराजी व्यक्त केली होती. ज्यांना गल्लीत कोणी विचारत नाही ते मुंबईतून नियुक्तीचे पत्र घेऊन येतात, गावात मिरवतात. त्यामुळे प्रामाणिक कार्यकर्त्यांचे खच्चीकरण होते. अशा परस्पर नियुक्त्या कोण करतो अशी विचारणा करून त्यांनी सर्वांनाच धारेवर धरले होते.

समारोपाच्या भाषणात प्रदेशाध्यक्ष सुनील तटकरे यांनी संघटनेतील रिक्त पदे भरली जातील, सर्वांवर जबाबदारी सोपविली जाईल असे सांगितले होते. या सर्व पार्श्वभूमीवर बाबा गुजर यांनी राजीनामा दिला. नागपूर जिल्हा परिषदेच्या निवडणुकीच्या तोंडावर त्यांनी राजीनामा दिल्याने पक्षात मोठी अस्वस्थता निर्माण झाली आहे.

बाबा गुजर यांचा राजीनामा उद्याप मंजूर व्हायचा आहे. असे असले तरी राजाभाऊ टाकसाळे यांच्या नावाचे पत्र तयार असल्याचे खात्रीने सांगण्यात येत आहे. यावरून गुजर यांचा पर्याय राष्ट्रावादी काँग्रेसने आधीच शोधून ठेवला असल्याचे बोलले जात आहे.

टाकसाळे मृदुभाषी आहेत. अनेक वर्षांपासून संघटनेत काम करत आहेत. ते एका शाळेचे संस्थापक संचालक अजातशत्रू म्हणून त्यांची ओळख आहे. राजाभाऊ हे दोन्ही राष्ट्रवादीच्या कार्यकर्त्यांमध्ये समन्वय ठेवून आहेत.

FAQs :

1. बाबा गुजरांनी अध्यक्षपदाचा राजीनामा का दिला?
याबाबत अधिकृत कारण स्पष्ट झालेले नाही, मात्र संघटनात्मक बदलाचे संकेत आहेत.

2. पुढील जिल्हाध्यक्ष कोण होणार?
राजाभाऊ टाकसाळे यांचे नाव सध्या चर्चेत असून ते आघाडीवर आहेत.

3. या राजीनाम्याचा नागपूर ग्रामीण NCP वर काय परिणाम होणार?
संघटनात्मक फेरबदल होऊन पक्षात नवीन नेतृत्व उभे राहू शकते.

4. हा बदल निवडणुकीवर प्रभाव टाकेल का?
होय, स्थानिक निवडणुकीत या बदलाचा राजकीय समीकरणांवर परिणाम होण्याची शक्यता आहे.

5. नागपूर ग्रामीण NCP मध्ये आणखी कोणते नेते रेसमध्ये आहेत?
सध्या टाकसाळे आघाडीवर असले तरी अन्य काही नेतेही इच्छुक आहेत.