Nitin Gadkari : ‘मीही सुरुवातीला हीच चूक केली होती, तुम्ही बोध घ्या’; जातीनिहाय सेलबाबत बोलताना गडकरींचा भाजप नेत्यांना सल्ला

Nagpur, 06 April : आज देशातील सर्वाधिक मोठा पक्ष झालेल्या भारतीय जनता पक्षाला आता कोणाकोणाला तिकीट द्यायचे, असा प्रश्न पडू लागला आहे. जातीनिहाय सेल उघडल्याने यात आणखीन अडचणी वाढू लागल्या आहेत. महापालिकेचा एका जागेसाठी पन्नास पन्नास इच्छुक दावे करीत आहेत. जातीनुसार कोटा मागितला जात आहे. यामुळे भविष्यात मोठी समस्या उद्‌भवणार असल्याचा इशारा देऊन केंद्रीय मंत्री नितीन गडकरी यांनी जातीनिहाय सेल बंद करण्याचा सल्ला भाजपच्या नेत्यांना दिला आहे. मीसुद्धा हीच चूक सुरुवातीला केली होती. ती सुधारली. आता तुम्हीसुद्धा यापासून बोध घ्या, असा सल्ला देऊन त्यांनी भाजपचा कार्यकर्ता हीच सर्वोच्च ओळख असावी, अशीही अपेक्षा व्यक्त केली.

भारतीय जनता पक्षाच्या स्थापना दिनानिमित्त नागपूर येथील भाजप कार्यालयाच्या भूमिपूजन प्रसंगी केंद्रीय मंत्री नितीन गडकरी (Nitin Gadkari) बोलत होते. या वेळी मंचावर मुख्यमंत्री देवेंद्र फडणवीस, भाजपचे प्रदेशाध्यक्ष आणि राज्याचे महसूल मंत्री चंद्रशेखर बावनकुळे प्रामुख्याने उपस्थित होते, त्या वेळी नितीन गडकरी यांनी भाजपला जातीनिहाय सेल बंद करण्याची सूचना केली.

आपला दीर्घ राजकीय प्रवास, आणीबाणीच्या काळातील भाजपची (BJP) राजकीय परिस्थिती, संघर्ष, अडचणी या सर्व मुद्यांना स्पर्श करून केंद्रीय मंत्री गडकरी यांनी आजचे नेते आणि कार्यकर्त्यांनी त्याची जाणीव ठेवावी, असे आवाहन केले.

गडकरी म्हणाले, केंद्रात आणि महाराष्ट्रात आज भाजपचे सरकार आहे. शून्यापासून सुरुवात केलेला भाजप आज सर्वात मोठा पक्ष झाला आहे. एकेकाळी विशिष्ट विचारांचा आणि जातीचा पक्ष अशी भाजपची ओळख होती. सर्व समजाला जोडण्यासाठी भाजपने आजवर अनेक प्रयोग केले आहेत.

सर्वाना सामावून घेतले आहे. विविध आघाड्या स्थापन केल्या आहेत. जातीनिहाय सेल उघडले. आता पक्ष मोठा झाला असून सत्तेत आला आहे. मोठा जनाधार निर्माण झाला, त्यामुळे निवडणूक लढणाऱ्या इच्छुकांची संख्या वाढली आहे. प्रत्येक आघाड्या आणि सेलमार्फत तिकिटांची मागणी होऊ लागली आहे.

अलीकडे मराठा समाज आणि ओबीसी समाज यांच्यात आरक्षणावरून संघर्ष निर्माण झाला आहे. जातीय अस्मिता बळावू लागल्या आहेत. एखाद्याचे तिकीट कापले तरी अन्यायाचे अस्त्र उगारले जात आहे. भाजप सर्वाधिक मोठा पक्ष असल्याने याच पक्षाला त्याची सर्वाधिक झळ बसत असल्याचे दिसून येत आहे. या सर्व घडामोडी बघता नितीन गडकरी यांनी केलेल्या सूचनेवर आता भाजप काय भूमिका घेते, याकडे सर्वांचे लक्ष राहणार आहे. गडकरी यांनी भाजपचे प्रदेशाध्यक्ष बावनकुळे यांचे नाव घेऊन या गंभीर बाबीकडे त्यांचे लक्ष वेधले आहे.