BJP Politics : भाजपमध्ये प्रवेश करण्यासाठी बडगुजर मुंबईला रवाना, पण बावनकुळे म्हणतात, "चर्चेशिवाय आमच्याकडे पक्षप्रवेश होत नाही..."

Nagpur News, 17 Jun : ठाकरेंच्या शिवसेनेचे नेते सुधाकर बडगुजर हे मंगळवारी (ता.17) भाजपमध्ये प्रवेश करणार आहेत. मुंबईतील भाजप मुख्यालयात त्यांचा पक्षप्रवेश होणार असून यासाठी बडगुजर आपल्या हजारो कार्यकर्त्यांना घेऊन मुंबईच्या दिशेने रवाना झाले आहेत.

राज्यभरात सुधाकर बडगुजर यांच्या पक्ष प्रवेशाची चर्चा सुरू असतानाच भाजप प्रदेशाध्यक्ष चंद्रशेखर बावनकुळे यांनी केलेल्या एका वक्तव्यामुळे आता बडगुजर यांच्या भाजप प्रवेशावर प्रश्नचिन्ह उपस्थित केलं जात आहे. सुधाकर बडगुजर यांच्या पक्ष प्रवेशाविषयी माझ्याकडे कोणतीही माहिती उपलब्ध नसल्याचं वक्तव्य बावनकुळेंनी केलं आहे.

चंद्रशेखर बावनकुळे नेमकं काय म्हणाले?

नागपूरमध्ये माध्यमांशी बोलताना बावनकुळे म्हणाले, सुधाकर बडगुजर यांच्या भाजप पक्ष प्रवेशाबाबतची कोणतीही माहिती माझ्याकडे नाही. स्थानिक पदाधिकारी, खासदार आणि आमदारांशी चर्चा करून आणि एकमत झाल्याशिवाय आमच्याकडे पक्षप्रवेश होत नाही.

बडगुजरांच्या प्रवेशाला स्थानिक पदाधिकऱ्यांचा विरोध आहे, असं त्यांनी म्हटलं आहे. तसं बडगुजर यांच्या पक्ष प्रवेशाला नाशिकच्या स्थानिक पदाधिकाऱ्यांचा विरोध आहे. निवडणुकीच्या राजकारणात जेव्हा आपण एकमेकांच्या विरोधात लढतो.

शिवाय आता निवडणुकीला केवळ सहा महिने झाल्यामुळे सध्या नाशिकमध्ये बडगुजर यांच्याविषयी विरोधाची भावना असल्याचंही त्यांनी यावेळी स्पष्ट केलं. बावनकुळेंच्या या वक्तव्यानंतर आता बडगुजर यांच्या भाजपमधील पक्ष प्रवेशावर प्रश्नचिन्ह उपस्थित केलं जात आहे.

एकीकडे स्थानिक पदाधिकाऱ्यांचा विरोध डावलून त्यांना पक्षात स्थान दिल्याच्या चर्चा सुरू असतानाच खुद्द पक्षाच्या प्रदेशाध्यक्षांनीच आपणाला याबाबतची काही माहिती नसल्याचं वक्तव्य केल्यामुळे सध्या बडगुजरांना भाजपमध्ये एन्ट्री मिळणार की नाही? याबाबतच्या चर्चांना उधाण आलं आहे.