Shivsena News : साहेब, खरंच सांगतो, तुम्ही पुन्हा निवडून येणार नाहीत; उद्धव ठाकरेंची साथ सोडणाऱ्या फुटीर खासदाराला शिवसैनिकाचा थेट फोन, ऑडिओ क्लिपच व्हायरल

hingoli News : राज्याच्या राजकारणात गेल्या 15 दिवसापूर्वी मोठ्या घडामोडी घडल्या आहेत. उद्धव ठाकरे यांची साथ सोडत सहा खासदारांनी एकनाथ शिंदे यांच्या शिवसेनेत प्रवेश केला आहे. या सहा फुटीर खासदाराविषयी ग्रामीण भागात रोष दिसून येत आहे. त्यामुळे वातावरण चांगलेच तापलेले आहे. त्यातच हिंगोलीचे खासदार नागेश पाटील-आष्टीकर यांनी उद्धव ठाकरेंची साथ सोडली. विशेषतः त्यांच्या चिरंजीवाला नांदेड मतदारसंघातून शिवसेनेची उमेदवारी दिलेली असतानाही त्यांनी साथ सोडली. त्यांच्याविषयी शिवसैनिकात मोठा रोष आहे. अशातच एका शिवसैनिकाने हिंगोलीचे खासदार नागेश पाटील-आष्टीकर यांना थेट फोन लावून पक्षांतर का केले म्हणून जाब विचारला असल्याची ऑडिओ क्लिप सोशल मीडियावर व्हायरल झाली आहे.

उद्धव ठाकरे (Uddhav Thackeray) यांची साथ सोडलेल्या सहा खासदारांना त्यांच्या पक्षातील नेते व कार्यकर्त्याच्या रोषाला सामोरे जावे लागत आहे. त्यातच दुसरीकडे सोडून गेलेल्या खासदारांना जाब विचारा असे फर्मानाच पक्षप्रमुख उद्धव ठाकरे व खासदार संजय राऊत यांनी काढले आहे. त्यामुळेच एका शिवसैनिकांनी हिंगोलीचे खासदार नागेश पाटील-आष्टीकर यांना जाब विचारला असल्याचे समोर आले आहे.

व्हायरल झालेल्या क्लिपमध्ये शिवसैनिक खासदार आष्टीकराना म्हणाला की, 'साहेब, तुम्ही उद्धव साहेबांच्या सैनेतून तिकडे का गेले? तुमच्यासाठी आम्ही गावोगाव हिंडलो, मशालीसाठी आम्ही परेशान झालो, साहेब तुम्ही हे बरोबर नाही केले. तुम्ही पुन्हा निवडून येत नाहीत साहेब, शंभर टक्के सांगतो, पुन्हा तुम्ही निवडून येत नाहीत. या क्ल्पिमधील आवाज हा हदगाव तालुक्यातील ईरापूर येथील शिवसैनिक नंदकिशोर देशमुख यांचा असल्याचे समोर आले आहे.

शिवसैनिक नंदकुमार देशमुख यांनी व्हायरल क्लिपवर बोलताना म्हणाले, ‘नागेश पाटील आष्टीकर हे मशाल चिन्हावर निवडून आले. ते आता पक्ष सोडून गेले हे त्यांना शोभते का? तुम्ही पाटील आहात, पाटलांना हे शोभत का? त्यांची गद्दारी ही हिंगोलीसाठी कलंक आहे. साहेबांनी त्यांना विश्वासाने उमेदवारी दिली होती. मी त्यांना तेच विचारत होतो. त्यानंतर त्यांनी सांगितले की, मला येऊन भेट, अजून ही त्यांची दादागिरी संपलेली नाही.’

मला एकच चीड आहे, त्यांना मी मतदान केले आहे. खिशातील पैसे खर्च केले, त्यांनी खासदार व्हावे म्हणून आम्ही प्रयत्न केले. खासदार संजय राऊत हे योग्य आहेत. तिकडे जायचे असल्यास राजीनामा द्यावा, मग तिकडे जा. त्यांनी पाटील नावाला कलंक लावला आहे. निधी मिळत नाही म्हणून गद्दारी केली, असे त्यांचे म्हणने असल्याचे नंदकुमार देशमुख म्हणाले.

देशमुख यांच्यांशी उद्धव ठाकरे फोनद्वारे साधणार संवाद

ठाकरे यांच्या शिवसेनेचे खासदार अरविंद सावंत यांनी नागेश पाटील-आष्टीकर यांना फोन करणाऱ्या नंदकिशोर देशमुख यांना फोन केला आहे. यावेळी सावंत यांनी देशमुख यांना धीर दिला. त्यासोबतच उद्धव ठाकरे हे शिवसैनिक नंदकुमार देशमुख यांच्यासोबत संवाद साधणार असल्याचे समजते, त्यामुळे त्याकडे सर्वांचे लक्ष लागले आहे .