मुंबई : माजी गृहमंत्री अनिल देशमुख (Anil Deshmukh) यांच्याविरोधात बडतर्फ सहाय्यक पोलीस निरीक्षक सचिन वाझे (Sachin Waze) याने माफीचा साक्षीदार होण्याची तयारी दर्शवली आहे. शंभर कोटी रुपयांच्या वसुली प्रकरणाचा तपास करणाऱ्या सक्त वसुली संचालनालयाला (ED) वाझेने याबाबत पत्र लिहिले आहे. या पत्रासंदर्भात ईडीकडून 14 फेब्रुवारीला न्यायालयात म्हणणे मांडले जाणार आहे. दरम्यान देशमुखांच्या वकिलांनी याला आक्षेप घेतला आहे.
या प्रकरणासंदर्भातील मला ज्ञात असलेली संपूर्ण वस्तुस्थिती सक्षम न्यायदंडाधिकाऱ्यांसमोर सत्य आणि ऐच्छिकपणे प्रकट करण्यास तयार आहे. CRPC कलम ३०६, ३०७ नुसार मला माफी देण्यासाठी या अर्जावर निर्णय घेण्याची मी तुम्हाला विनंती करतो, असे सचिन वाझेने पत्रात म्हटले आहे. याला देशमुखांचे वकील इंद्रपालसिंग यांनी आक्षेप घेतला आहे. त्यांनी म्हटले आहे की, सचिन वाझे हा माफीचा साक्षीदार होऊ शकत नाही. वाझे हा अँटिला, मनसुख हिरेन हत्या आणि वसुली प्रकरणातील मुख्य आरोपी आहे. त्याच्यावर या पूर्वीही गंभीर गुन्ह्या़ची नोंद आहे वाझे हा परमबीरसिंह यांच्या सांगण्यावरून अनिल देशमुख यांच्यावर खोटे आरोप करत आहे.
यापूर्वी चांदीवाल समितीसमोर सचिन वाझेने आपली साक्ष फिरवण्यासाठी अर्ज केला होता. यामध्ये देशमुखांनी मला वसुलीचे आदेश दिले होते आणि वसूल केलेले पैसे त्यांच्या लोकांना दिले, असा आरोप वाझेने केला आहे. मात्र, समितीने तो फेटाळून लावला होता. चांदीवाल समितीसमोर सचिन वाझेने उलटतपासणीत, अनिल देशमुख यांनी त्याला बार आणि आस्थापणाकडून वसुलीचे आदेश दिले नसल्याचे सांगितले होते. पण आपण दबावापोटी देशमुखांच्या बाजूने साक्ष दिल्याचे वाझेने आयोगासमोर दिलेल्या पत्रात म्हटले आहे.
मुंबईचे माजी पोलिस आयुक्त परमबीरसिंह यांनी तत्कालिन गृहमंत्री अनिल देशमुखांवर १०० कोटी वसुलीचे आरोप करून राज्याच्या राजकारणात खळबळ उडवून दिली होती. त्यानंतर देशमुख यांना राजीनामा द्यावा लागला होता. सध्या देशमुख आणि वाझे दोघेही कोठडीत असून चांदीवाल समितीकडून दोघांचीही चौकशी सुरू आहे. तर दुसऱ्या बाजूला ईडीने दोषारोपपत्र दाखल केल्यानंतर अनिल देशमुख यांनी जामिनासाठी ईडी न्यायालयात अर्ज दाखल केला आहे. त्यावर 14 फेब्रुवारीला सुनावणी होणार आहे. मात्र, वाझेने लिहिलेल्या पत्रामुळे देशमुखांना जामीन मिळतो की नाही हे पाहावे लागणार आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
