Dombivli Gymkhana Election : डोंबिवली जिमखाना निवडणुकीत राजकीय हस्तक्षेप; माजी आमदाराचा गंभीर आरोप

Dombivli News : डोंबिवलीतील प्रतिष्ठित डोंबिवली जिमखान्याच्या कार्यकारिणीची निवडणूक येत्या १६ ऑगस्ट रोजी होत असून, निवडणुकीपूर्वीच राजकीय वातावरण तापण्याची चिन्हे दिसू लागली आहेत. मनसेचे नेते, माजी आमदार राजू पाटील यांनी यांनी या निवडणुकीत राजकीय हस्तक्षेप होत असल्याचा आरोप केला आहे.

राजू पाटील यांनी याबाबत सोशल मीडियावर पोस्ट केली आहे. त्यामध्ये म्हटले आहे की, आपण डोंबिवली जिमखान्याचे आजीवन सदस्य असल्याचे आहे. मात्र, यापूर्वी जिमखान्याच्या निवडणुकांमध्ये सक्रिय सहभाग घेतला नाही. निवडून आलेले सदस्य कोणत्या ना कोणत्या राजकीय पक्षाचे समर्थक असले तरी जिमखान्याच्या कामकाजावर त्याचा परिणाम झाल्याचे कधी जाणवले नाही.मात्र, यंदाच्या निवडणुकीत त्यांना स्पष्टपणे राजकीय हस्तक्षेप जाणवत आहे.

विशेष म्हणजे, पाटील यांनी आपल्या पोस्टमधून डोंबिवलीतील सावरकर उद्यान आणि नेहरू मैदानाचा मुद्दाही उपस्थित केला आहे. “मैदानांचे लचके तोडणारी मंडळी यावेळी निवडणूक लढवताना दिसत आहेत,” असा थेट आरोप त्यांनी केला आहे. त्यामुळे त्यांच्या या वक्तव्याचा रोख नेमका कोणाकडे आहे, याबाबत जिमखाना सदस्यांमध्ये आणि राजकीय वर्तुळात चर्चा सुरू झाली आहे.

जिमखान्याची अराजकीय आणि स्वायत्त ओळख कायम राहावी, अशी भूमिका घेत पाटील यांनी सदस्यांना विचारपूर्वक मतदान करण्याचे आवाहन केले आहे. जिमखाना भविष्यात कोणत्याही एका राजकीय पक्षाचे मैदान होऊ नये, यासाठी सदस्यांनी सजग राहण्याची गरज असल्याचेही त्यांनी म्हटले आहे.

दरम्यान, १६ ऑगस्टच्या निवडणुकीपूर्वीच झालेल्या या राजकीय आरोपांमुळे जिमखान्याच्या निवडणुकीला वेगळेच वळण मिळाले आहे. पाटील यांच्या “मैदानांचे लचके तोडणारी मंडळी” या उल्लेखाचा नेमका संदर्भ कोणाकडे आहे, याची चर्चा आता डोंबिवलीच्या राजकीय वर्तुळात रंगू लागली आहे.