Maharashtra Politics : जयंत पाटील अन् CM फडणवीसांच्या भेटीवर ठाकरेंच्या शिवसेनेतून पहिली प्रतिक्रिया आली समोर

Mumbai News, 15 Jul : राज्याच्या राजकारणात काल मध्यरात्री एक मोठी घडामोड घडली. ती म्हणजे, शरद पवारांच्या राष्ट्रवादीचे नेते जयंत पाटील यांच्यासह राष्ट्रवादी अजित पवार पक्षाचे प्रदेशाध्यक्ष सुनील तटकरे आणि प्रफुल पटेल या तीन नेत्यांनी अचानक 'वर्षा' बंगल्यावर जाऊन मुख्यमंत्री देवेंद्र फडणवीस यांची भेट घेतली.

या भेटीवरून आता अनेक तर्कवितर्क लावले जात आहेत. ही भेट नेमकी कशा संदर्भात झाली? शरद पवारांची राष्ट्रवादीत सत्तेत सहभागी होणार की काय? अशा चर्चांना उधाण आलं आहे. याच सर्व घडामोडी सुरू असताना आता यावर ठाकरेंच्या शिवसेनेने प्रतिक्रिया दिली आहे.

ठाकरेंच्या शिवसेनेच्या प्रवक्त्या आणि उपनेत्या सुषमा अंधारे यांनी सूचक प्रतिक्रिया दिली आहे. सुनील तटकरे आणि पटेल यांच्या पाठोपाठ जयंत पाटलांनी वर्षावर जाऊन फडणवीसांची फेट घेतली. यावर बोलताना अंधारे म्हणाल्या, "या भेटी संदर्भात मला आता काहीही मत मांडता येणार नाही. कारण जयंत पाटील साहेब हे महाविकास आघाडीचे एक महत्त्वाचे नेते आहेत.

तर वर्षा बंगल्यावर या राज्याचे मुख्यमंत्री देवेंद्र फडणवीस राहतात. भारतीय जनता पार्टी या पक्षासोबत आमचे मतभेद आहेत आणि ते कायम राहतील. पण त्या पक्षाचे नेते या राज्याचे मुख्यमंत्री आहेत. त्यामुळे राज्याच्या मुख्यमंत्र्याला भेटायला महाविकास आघाडीचे नेते गेले आहेत का? की अजून काही कारण आहे. यावर मी आत्ता काहीच प्रेडिक्ट करू शकत नाही," अशी सावध प्रतिक्रिया अंधारे यांनी दिली आहे.

एकीकडे ठाकरेंच्या शिवसेनेने सावध प्रतिक्रिया दिली असली तरी दुसरीकडे अजित पवारांच्या राष्ट्रवादीचे नेते तथा माजी आमदार अमोल मिटकरी यांनी या भेटीवर थेट भाष्य केलं आहे. जर जयंत पाटील वर्षा बंगल्यावर गेले असतील तर नक्कीच राजकारणात काहीतरी ट्विस्ट आहे. शिवाय पवारांच्या राष्ट्रवादीचे अनेक आमदार खासदार एनडीएसोबत जाण्यासाठी इच्छुक आहेत, असं मिटकरी यांनी म्हटलं आहे.