Rohit Pawar : ...तर राज्यात मध्यावधी निवडणुका लागणार! रोहित पवारांकडून नव्या राजकीय भूकंपाचं भाकीत

Rohit Pawar : राज्यात पुढील काही महिन्यात मोठा राजकीय भूकंप होण्याची शक्यता शरद पवारांच्या राष्ट्रवादीचे आमदार रोहित पवार यांनी व्यक्त केली आहे. येत्या तीन महिन्यात सुप्रीम कोर्टात शिवसेना-राष्ट्रवादी हा पक्ष आणि चिन्हं कोणाचं? याचा अंतिम निकाल येण्याची शक्यता आहे. यापार्श्वभूमीवर राज्यात मध्यावधी निवडणुका लागतील असा दावा रोहित पवारांनी केला आहे. त्याचबरोबर उपमुख्यमंत्री एकनाथ शिंदे आणि अजित पवार यांच्या राजकीय भवितव्यावरही त्यांनी प्रश्नचिन्ह उपस्थित केलं आहे.

रोहित पवार नेमकं काय म्हणाले?

घड्याळ चिन्ह आम्हाला मिळेल आणि धनुष्यबाण हे चिन्ह उद्धव ठाकरेंना मिळेल. हे दोन्ही चिन्ह ओरिजिनल पार्टीला मिळाल्यानंतर अजितदादा आणि एकनाथ शिंदे यांच्याकडं दोनच पर्याय असतील. एक म्हणजे भाजपत विलीन व्हायचं नाहीतर येत्या तीन महिन्यात जेव्हा सुप्रीम कोर्टाचा निकाल आमच्या बाजूनं येईल तेव्हा लगेचच तिथं निवडणूक जाहीर केली जाईल.

यामध्ये दोन्ही नेत्यांच्या आमदारांच्या जागांवर पुढील काही महिन्यात निवडणूक परत होऊ शकते. तुम्ही जर भाजपची खेळी बघितली तर जिथं जिथं अजित पवार आणि एकनाथ शिंदे यांचे आमदार आहेत. तिथं विरोधीपक्षातला कुठला तरी नेता जो काँग्रेसचा असून नाहीतर कुठल्याही पक्षाचा असू देत त्या व्यक्तीला त्यांनी भाजपत घेतलं आहे. त्यामुळं भाजप तयार आहे या दोघांचा काटा काढायला.

दरम्यान, भाजपचे आमदार प्रवीण दरेकर यांनी त्यांच्यावर बच्चा म्हणून टीका केली. त्यांनी म्हटलं की, मला वाटतं रोहित पवार अजून बच्चा आहे. एवढ्या मोठ्या नेत्यांवर एवढी मोठी भाकितं करताना मला वाटतं त्यांनी थोडं प्रगल्भ व्हावं थोडं राजकीय उन्हा-पावसात भिजावं आणि मग बोलावं. आता शरद पवारांच्या भूमिकेत जाऊन वक्तव्य करुन मला वाटतं हे पोरकटपणाचं आहे.