Aaditya Thackeray : "राहुल गांधींना पंतप्रधान व्हायचं असेल तर भाजपत जावे, कारण...", आदित्य ठाकरेंचं विधान

महाराष्ट्राच्या राजकारणात मोठ्या राजकीय उलथापालथ होत आहेत. मिलिंद देवरा, बाबा सिद्दीकीनंतर माजी मुख्यमंत्री अशोक चव्हाण ( Ashok Chavan ) यांनी काही दिवसांपूर्वी काँग्रेसचा 'हात' सोडत भाजपत प्रवेश केला होता. हाच मुद्दा घेऊन शिवसेना ( ठाकरे गट ) आमदार आदित्य ठाकरे यांनी खोचक विधान केलं आहे. राहुल गांधी यांना पंतप्रधान व्हायचं असेल, तर भाजपत जावे. कारण, भाजपत गेलेले सगळे आमदार, खासदार काँग्रेसमधीलच आहेत, असं वक्तव्य आदित्य ठाकरेंनी केलं आहे.

लालबाग येथे आदित्य ठाकरे ( Aaditya Thackeray ) यांची 'महानिष्ठा, महान्याय' सभा पार पडली. यावेळी आदित्य ठाकरेंनी भाजपवर हल्लाबोल केला आहे. "भाजपनं 'अच्छे दिन आयेंगे' हे सांगायचं बंद केलं आहे. आता 'वॉशिंग पावडर भाजप, डाग अच्छा है', ही त्यांची नवीन टॅगलाईन आहे. तुम्ही भ्रष्टाचारी असाल, खोके घेऊन धोका दिला, खून किंवा दरोडा टाकला असेल, तर तुम्हाला भाजपत घेऊन तेथील कार्यकर्त्यांच्या डोक्यावर बसवतील," असं आदित्य ठाकरेंनी म्हटलं.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

"राज्यसभेच्या निवडणुकीत 6 मधून 4 जण भाजपतील आहेत. कुठे काँग्रेसमुक्त भारत होत आहे? काँग्रेसयुक्त भाजप होत आहे. ज्यांच्यावर आरोप लागले आहेत, ते भाजपत जात आहेत. काँग्रेस आता स्वच्छ झाली आहे. शिवसेनेतील अनेकजण लढत आहेत. किशोरी पेडणेकर, राजन साळवी सुद्धा हिंमतीनं, ताकदीनं लढत आहेत. रवींद्र वायकर यांच्यावर दबाव आहे. संजय राऊत तुरूंगात जाऊन आल्यापासून कुणालाच घाबरत नाहीत. सूरज चव्हाणही लढत आहे," असं म्हणत आदित्य ठाकरेंनी भाजपवर हल्लाबोल केला आहे.

"दुसऱ्या बाजूला आपण केलेली काम पुसून टाकण्याचा प्रयत्न चालू आहे. पण, दोन गोष्टी मुंबई महाराष्ट्र, देश आणि ज्या 33 देशांनी नोंदी घेतली तिथून पुसू शकत नाही. एक म्हणजे उद्धव ठाकरेंनी केलेलं काम आणि दुसरं तुमच्या माथेवर चोर, निर्लज्ज, गद्दार म्हणून शिक्का बसलाय तो," अशी टीका आदित्य ठाकरेंनी शिंदे गटावर केली आहे.