Konkan graduate Election : 'फॉर्म कसा भरायचा, मतदान कसं करायचं'; राज ठाकरेंनी घेतला मनसैनिकांचा वर्ग

Thane News : कोकण पदवीधर मतदारसंघाची निवडणूक कोणत्याही परिस्थितीत जिंकायचीच, असा चंग महाराष्ट्र नवनिर्माण सेनेने बांधला आहे. त्यासाठी खुद्द पक्षप्रमुख राज ठाकरे मैदानात उतरले आहेत. राज ठाकरे यांनी आज (ता. १६ नोव्हेंबर) ठाण्यात येऊन फॉर्म कसा भरायचा यापासून मतदान कसे करावे, इथपर्यंत पक्ष पदाधिकाऱ्यांचा शब्दशः वर्ग घेतला. (Raj Thackeray reviewed the election of Konkan graduate constituency )

राज्यातील सर्वच पक्षांनी लोकसभा निवडणुकीच्या तयारीला सुरुवात केली आहे. मनसेने लोकसभेबरोबरच कोकण पदवीधर मतदारसंघाची निवडणूकही जिंकण्यासाठी मार्चेबांधणी केली आहे. त्या अनुषंगाने मनसे प्रमुख राज ठाकरे हे आज ठाण्याच्या दौऱ्यावर होते. त्यांना पक्ष पदाधिकाऱ्यांना मार्गदर्शन करतानाही कोकण पदवीधर निवडणुकीवरच जोर दिला.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

कोकण पदवीधर मतदारसंघाच्या निवडणुकीच्या पार्श्वभूमीवर राज ठाकरे यांनी ठाणे, कल्याण, डोंबिवली, उल्हासनगर, मीरा भाईंदर, नवी मुंबई, पालघर येथील प्रमुख पदाधिकाऱ्यांना मतदानाबाबत मार्गदर्शन केले. पदवीधर मतदारसंघाची निवडणूक कशी लढवायची, त्याबाबतचा फॉर्म कसा भरला जातो, पदवीधरसाठी मतदान कसे करावे आदींसह इतर महत्त्वाच्या विषयांवर त्यांनी पदाधिकाऱ्यांची शाळा घेतली.

कोकण मतदारसंघात येणाऱ्या शहरांतील पदाधिकाऱ्यांनी किती पदवीधरांचे फॉर्म भरले, याची माहितीही राज ठाकरे यांनी घेतली. ही माहिती घेण्याबरोबरच फार्म कसे भरले जातात याबाबत मार्गदर्शन केले, तसेच पदवीधर मतदारसंघाची निवडणूक कशा पद्धतीने लढवावी. प्रत्यक्ष निवडणुकीत मतदान कसे करावे, मतदारांना कशा पद्धतीने जागरूक केले पाहिजे, यासंदर्भातही राज यांनी पदाधिकाऱ्यांना माहिती दिली.

कोकण पदवीधर निवडणुकीच्या तयारीच्या दृष्टीने राज ठाकरे यांच्या उपस्थितीत ठाणे, कल्याण डोंबिवली, उल्हासनगर, मीरा भाईंदर, नवी मुंबई, पालघर आदी भागातील प्रमुख पदाधिकाऱ्यांच्या बैठक आयोजित करण्यात आली होती. पदवीधर निवडणुकीसंदर्भात बोलत असतानाच टोल नाक्याबाबत लवकरच बैठक होणार आहे, असे संकेतही राज यांनी या वेळी दिले.