Rohit Pawar News: कोर्टात खेचण्याच्या इशाऱ्यानंतरही रोहित पवारांनी कोकाटेंना सोडलंच नाही; म्हणाले,जाहिरात स्कीप करायला 42 सेकंद..?

Mumbai News : राज्याचे कृषिमंत्री माणिकराव कोकाटे यांनी मंगळवारी (ता.22) पत्रकार परिषद घेत त्यांच्यावरील सर्व आरोपांचे खंडन करतानाच त्यांची बदनामी करणाऱ्यांना कोर्टात खेचण्याचा इशारा दिला होता. त्यानंतर काही वेळातच कर्जत-जामखेड मतदारसंघाचे आमदार रोहित पवार यांनी माणिकराव कोकाटेंचे दोन नवीन व्हिडिओ पोस्ट केले आहेत. याचदरम्यान त्यांनी जाहीरात स्किप करायला 42 सेकंद लागतात का असा खोचक सवालही केला आहे.

राष्ट्रवादी काँग्रेस शरदचंद्र पवार पक्षाचे आमदार रोहित पवार (Rohit Pawar) यांनी टि्वट करत माणिकराव कोकाटे यांना डिवचलं आहे. त्यांनी आपल्या ट्विटमध्ये राजीनामा द्यावाच लागेल! असं म्हटलं आहे. तसेच सभागृहाचे कामकाज संपल्यानंतर मोबाईल बघत असताना आलेली जाहिरात स्कीप करत होतो, असा खुलासा करणाऱ्या राज्याचे कृषीमंत्री माणिकराव कोकाटे यांचे यासंदर्भातील दोन व्हिडिओ पुन्हा सोशल मीडियावर पोस्ट करत जाहिरात स्कीप करायला 42 सेकंद लागतात का? असा सवालही केला आहे.

रोहित पवार यांनी हे व्हिडिओ पोस्ट करताना म्हणतात, ‘सभागृहाचे कामकाज संपले होते, हे कृषिमंत्री महोदयांचे विधान धडधडीत खोटे आहे. उलट विकासाच्या मूळ प्रवाहापासून दूर असलेल्या आदिवासी बांधवांना दुधाळ जनावरे देण्याच्या अत्यंत महत्त्वाच्या विषयावर सभागृहात चर्चा सुरु होती, पण ‘ओसाड गावच्या पाटलांना’ या चर्चेत रस नसावा. आणि मला सांगा पत्त्याची कोणती जाहिरात स्कीप करण्यासाठी 42 सेकंद लागतात हो..' अशा शब्दांत रोहित पवारांनी माणिकराव कोकाटेंवर (Manikrao Kokate) निशाणा साधला आहे.

पवार म्हणाले,‘विझताना दिव्याची ज्योत मोठी होते, तसंच काहीसं कोकाटेंचं झालं आहे. आज राजीनामा देऊन शेतकऱ्यांवर ते उपकार करतील, असं वाटत होतं, पण ‘गिरे तो भी टांग उपर’ अशी त्यांनी भूमिका घेत कोर्टात जाण्याची भाषा केली, हे दुर्देव आहे.

मंत्री महोदय स्वतःला वाचवण्यासाठी आज जेवढा खटाटोप करत आहेत त्यापेक्षा दिलेल्या पदाला न्याय देण्यासाठी केला असता तर ही वेळ आली नसती,’ असेही रोहित पवार यांनी या पोस्टमध्ये म्हटले आहे.

‘विधिमंडळाची अप्रतिष्ठा होऊ नये म्हणून आवाज असलेले हे व्हिडिओ शेअर करणे मी टाळत होतो, पण मंत्री महोदयांनी कोर्टात जाण्याची भाषा केल्याने नाईलाजाने मला सत्य जनतेच्या कोर्टात आणावे लागतेय. आता चौकशी करायचीच तर कृषीमंत्री पत्ते खेळत होते की नाही याचीही चौकशी करावी आणि ही चौकशी निष्पक्ष पद्धतीने होण्यासाठी नैतिकता दाखवून कोकाटेंनी मंत्रीपदाचा राजीनामा द्यावा, अशी मागणीही केली.

महत्त्वाचे म्हणजे सत्य हे झाकणार नसल्यानं राजीनामा देण्यासाठी पुढील अधिवेशनाची कशाला वाट पाहता आणि शेतकऱ्यांना सहन करायला लावता..' अशी खोचक टीकाही रोहित पवार यांनी पोस्टमध्ये केली आहे.

विरोधकांकडून कृषिमंत्री माणिकराव कोकाटे यांच्यावर सभागृहातच ऑनलाइन रमी खेळत असल्याचा आरोप करण्यात येत आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी या संदर्भात टि्वट करुन आरोप केला होता. माणिकराव कोकाटे यांच्यावर चोहोबाजूंनी टीका सुरु आहे. त्या पार्श्वभूमीवर माणिकराव कोकाटे यांनी पत्रकार परिषद घेऊन त्या आरोपांवर स्पष्टीकरण दिलं आहे.

कोकाटे म्हणाले, “ऑनलाइन रमी खेळताना मोबाईल नंबर अटॅच पाहिजे. बँकेचं अकाऊंट अटॅच पाहिजे. “ऑनलाइन रमी खेळताना मोबाईल नंबर अटॅच पाहिजे. बँकेचं अकाऊंट अटॅच पाहिजे. अशा प्रकारचं कोणताही मोबाईल नंबर आणि अकाऊंट माझं अटॅच नाही. माझे बँकेचे अकाऊंट देणार आहे. कुठेही चौकशी करा असं आव्हानही त्यांनी यावेळी आरोप करणाऱ्यांना दिलं.

माणिकराव कोकाटे यांनी ज्या राजकीय नेत्यांनी आरोप केला आणि माझी बदनामी केली. त्यांना मी कोर्टात खेचणार आहे” ,असा इशाराही दिला आहे.याचवेळी त्यांनी ऑनलाईन रमी सुरू झाल्यापासून आजपर्यंत एक रुपयाची रमी खेळलो नाही. मला रमी खेळता येत नाही. हा आरोप चुकीचा आणि बिनबुडाचा असल्याचं म्हटलं आहे.