Sanjay Raut : "शाहांबरोबर 'मातोश्री'त बंद खोलीत चर्चा झाली नाही", मुख्यमंत्र्यांच्या दाव्यावर राऊत प्रत्युत्तर देत म्हणाले...

दिल्लीला पंतप्रधान नरेंद्र मोदी यांना भेटण्यासाठी अजित पवार आणि अशोक चव्हाणांबरोबर उद्धव ठाकरे गेले होते. तेव्हा आतमध्ये घाली लोटांगण केले. सत्ता सोडायला तयार झाले, मला म्हणाले, पुढं आपल्याला सत्ता मिळेल का? म्हणजे सत्तेसाठी हे काहीही करायला होते. तसेच, अमित शाह यांच्याबरोबर बंद खोलीत चर्चा झाली नाही, असा मोठा दावा मुख्यमंत्री एकनाथ शिंदे ( Eknath Shinde ) यांनी केला होता. याला शिवसेना ( ठाकरे गट ) खासदार संजय राऊत यांनी प्रत्युत्तर दिलं आहे.

"किती खोटे बोलातात हे. मग, मिस्टर अमित शाह 'मातोश्री'त कशासाठी आले होते, हा प्रश्न या महाशयांनी स्वत:ला विचारावा. बंद दाराआड चर्चा करताना हे ( एकनाथ शिंदे ) 'मातोश्री'वर नव्हते. मी तिकडे उपस्थित होतो. यांना काय स्थान होते? कोण होते? हे पक्षाचे नेतेही नव्हते. आम्ही सगळ्यांनी मिळून यांना पक्षाचा नेता केलं," अशी टीका राऊतांनी ( Sanjay Raut ) मुख्यमंत्री शिंदेंवर केली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

"बाळासाहेबांच्या खोलीत अमित शाह आणि उद्धव ठाकरेंवर चर्चा झाली होती. येथे इतर भाजपचे नेते होते. हे भाजपचे गुलाम आणि नोकर झाले आहेत. यांच्या डोक्यावर परिणाम झाला आहे. त्यामुळे अशाप्रकारची बेताल वक्तव्य करतात. अमित शाह 'मातोश्री'वर कशासाठी आले होते? याचं उत्तर महाशयांनी द्यावं," असं आव्हान राऊतांनी मुख्यमंत्री शिंदेंना दिलं आहे.

"मोदी आणि शाहांबरोबर राहून मुख्यमंत्री शिंदेंना खोटं बोलण्याचं व्यसन जडलं आहे. देवेंद्र फडणवीसांनी सत्तेचं समसमान वाटप होणार असल्याचं सांगितलं होतं. हे रेकॉर्डवर आहे. यांच्या कानात आता बोळे बसले आहेत का? महाराष्ट्र यांना धडा शिकवेल," असा इशारा राऊतांनी मुख्यमंत्री शिंदेंना दिला आहे.

"आम्ही पळून जाणारे पळपुटे नाही आहोत. बाळासाहेबांची शिवसेना आम्ही दिल्लीच्या पायाशी ठेवली नाही. डुप्लिकेट शिवसेनेच्या अधिवेशनात नरेंद्र मोदींना पंतप्रधान करण्याचा ठराव मांडण्यात आला. ही लाचारी कशासाठी? बाळासाहेब ठाकरे असते, तर यांचा कडेलोट केला असता. हिंमत असेल तर मुंबई आणि ठाणे महापालिकेच्या निवडणुका घ्या," असं आव्हान राऊतांनी मुख्यमंत्र्यांना दिलं आहे.