Uday Samant: शिवसेना आमदारांची नाराजी, कॅबिनेटच्या बैठकीला दांडी! नेमकं कारण काय? उदय सामंतांनी थेटच सांगितलं

Uday Samant: राज्य मंत्रिमंडळाची आज मंत्रालयात बैठक पार पडली पण या बैठकीला शिवसेनेच्या आमदारांनी हजेरी लावली नसल्यानं राजकीय चर्चेला तोंड फुटलं आहे. शिवसेनेच्या आमदारांमध्ये भाजपविरोधात नाराजी असल्यानं प्री कॅबिनेटच्या बैठकीतच मुख्य कॅबिनेट बैठकीला हजेरी न लावण्याचा निर्णय झाल्याचं सांगितलं जात आहे. पण यावर आता शिवसेनेचे नेते मंत्री उदय सामंत यांनी स्पष्टीकरण दिलं आहे. सामंत स्वतः या बैठकीला हजर नव्हते, पण आमदारांच्या गैरहजेरीबाबत त्यांनी स्पष्टच माहिती दिली.

भाजपचे प्रदेशाध्यक्ष रविंद्र कदम यांच्या निवासस्थानी भेटीसाठी गेलेल्या उदय सामंत यांनी परत निघताना पत्रकारांशी संवाद साधला. यावेळी पत्रकारांनी त्यांच्यावर आजच्या कॅबिनेटला शिवसेनेच्या आमदारांनी हजेरी न लावल्याबद्दल प्रश्नांची सरबत्ती केली. यावेळी शिवसेनेच्या आमदारांमध्ये कुठलीही नाराजी नाही, अशी सारवासारव करताना कुठल्या आमदारांनी का बैठकीला हजेरी लावली नाही, हे सांगण्याचा प्रयत्न केला.

दरम्यान, सामंत म्हणाले, राज्याचे उपमुख्यमंत्री शिवसेनेचे मुख्य नेते एकनाथ शिंदे हे कॅबिनेट बैठकीला उपस्थित होते. त्यामुळं बैठकीवर बहिष्कार टाकल्याचं आपण म्हणू शकत नाही. पण जे गैरहजर होते त्यांच्या अडचणी मी तुम्हाला सांगितलेल्या आहेत. त्यामुळं मला असं वाटतं की, बहिष्काराचा विषयच येत नाही. मी मेडिकल चेकअपसाठी गेलेलो असल्यानं बैठकीला हजर राहू शकलो नाही. शंभर टक्के आम्ही कॅबिनेटच्या बैठकीवर बहिष्कार टाकलेला नव्हता. जी काही आमची भूमिका होती ती मुख्यमंत्र्यांकडं कदाचित मांडलेली असेल, पण तिथं नेमकं काय घडलं? याची मी माहिती घेतो.

गेल्यावेळी तिन्ही पक्षांच्या समन्वय समितीची बैठक पार पडली होती. तेव्हा सांगण्यात आलं होतं की, १८ नोव्हेंबर रोजी यासंदर्भात संयुक्त पत्रकार परिषद घेण्यात येईल, पण ही पत्रकार परिषद अद्याप झालेली नाही. यावर बोलताना सामंत म्हणाले की, अजून दिवस संपलेला नाही (म्हणजेच अद्यापही पत्रकार परिषद होण्याची शक्यता आहे).