Shivsena UBT-MNS : भाऊ-भाऊ फक्त एकत्रच येणार नाहीत... उद्धव अन् राज ठाकरेंच्या डोक्यात आहे वेगळाच प्लॅन!

Shivsena UBT-MNS : महाराष्ट्राच्या राजकारणात सध्या शिवसेना उद्धव बाळासाहेब ठाकरे आणि महाराष्ट्र नवनिर्माण सेना या दोन पक्षांच्या युतीची जोरदार चर्चा सुरु आहे. राज ठाकरे यांनी युतीबाबत सूचक संकेत दिल्यानंतर उद्धव ठाकरे यांनीही 'जे महाराष्ट्राच्या मनात आहे तेच होईल' असे म्हणत आणखी एक पाऊल पुढे टाकले.

त्याचवेळी दुसर्‍या बाजूला राजकीय विश्लेषकांच्या मते, या युतीच्या माध्यमातून केवळ दोन भाऊच एकत्र येणार असे नाही तर दोन्ही पक्षांच्या भविष्याच्या आणि नेतृत्वाच्या दृष्टीनेही ही युती महत्वाची असणार आहे. ज्येष्ठ पत्रकार हेमंत देसाई यांच्या मते, आगामी महापालिका निवडणुकीच्या पार्श्वभूमीवर मुंबईमध्ये दोन्ही ठाकरे नवे नेतृत्व प्रस्तापित करू पाहात आहेत.

शिवसेना उद्धव बाळासाहेब ठाकरे आणि मनसे एकत्र आल्यास भाजपसारख्या प्रबळ पक्षाच्या विरोधात लढण्याची धुरा नव्या पिढीतील ठाकरे बंधूंकडे असेल. पालिका निवडणुकीत हे दोन्ही नेतृत्व उदयास आल्यास ते ठाकरे बंधूंचे मोठे यश असेल, अशी चर्चा दोन्ही पक्षांत सुरू आहे. त्यामुळेच महापालिका निवडणूक ही आदित्य ठाकरे आणि अमित ठाकरे यांच्यासाठी महत्त्वाची मानली जात आहे.

काही दिवसांपूर्वी वाशी येथे पक्षाच्या पदाधिकाऱ्यांनी अमित ठाकरे यांच्या नेतेपदावर शिक्कामोर्तब केला होता. त्यानंतर त्यांच्याकडून जनतेच्या अपेक्षा वाढल्या आहेत. याशिवाय आदित्य ठाकरे यांचाही आमदार म्हणून राज्यासह महापालिका प्रशासन, कंत्राटदार, रस्त्यांचे काँक्रिटीकरण, त्यातील गैरव्यवहार याबाबत अभ्यास आहे.

या कारणांमुळेच मुंबई महापालिका निवडणुकीची धुरा आदित्य आणि अमित या दोघांच्या खांद्यावर दिली जाण्याची शक्यता आहे. एक प्रकारे अमित आणि आदित्य या दोघांचीही नेतृत्व म्हणून येणारी निवडणूक लिटमस टेस्ट असणार आहे. उद्धव ठाकरे यांचेही नेतृत्व महापालिका निवडणुकीतूनच पुढे आले होते, अशीही आठवण राजकीय विश्लेषक करून देतात.

आतापर्यंत शिवसेनेतील बरेच माजी नगरसेवक हे एकनाथ शिंदे यांच्या शिवसेनेत गेले आहेत. पण राज आणि उद्धव ठाकरे यांची युती झाल्यास बहुतांश माजी नगरसेवक परत येऊ शकतात. या निवडणुकीत शिवसेनेला आणि मनसेला पुन्हा उभारी मिळण्यासह मराठी टक्काही बळकट होईल. त्याचे श्रेय आदित्य आणि अमित यांना मिळू शकते, अशी चर्चा रंगली आहे.