Thane Municipal Election : शिंदेंच्या उमेदवाराच्या अर्जातही त्रुटी, पण बाद केले फक्त मनसे, वंचित अन् ठाकरेंच्या शिवसेनेचे, निवडणूक अधिकाऱ्यांवर पक्षपात केल्याचा आरोप

Mumbai News, 01 Jan : आगामी महापालिका निवडणुकीसाठी इच्छुकांनी आपले उमेदवारी अर्ज दाखल केले आहेत. मात्र, काही उमेदवारांचे अर्ज बाद ठरले आहेत. अशातच आता ठाणे महापालिका निवडणुकीसाठी शिंदेंच्या शिवसेनेचा बालेकिल्ला मानल्या जाणाऱ्या वागळे इस्टेट परिसरातील प्रभाग क्रमांक 16, 17 आणि 18 मधील उमेदवारांचे अर्ज बाद केल्यावरून वाद सुरू झाला आहे.

कारण ठाकरेंची शिवसेना, मनसे आणि वंचित बहुजन आघाडीसह अपक्ष उमेदवारांचे नामनिर्देशन अर्ज बाद केल्यामुळे या पक्षाच्या नेत्यांनी संताप व्यक्त करत निवडणूक निर्णय अधिकाऱ्यांवर पक्षपाती आणि अन्यायकारक भूमिका घेतल्याचा गंभीर आरोप केला आहे.

शिवाय या उमेदवारांनी आजपासून उपोषणाला बसण्याची घोषणा देखील केली आहे. त्यामुळे आता नवीन वर्षाच्या सुरूवातीलाच उमेदवारी अर्जावरून ठाण्यात मोठा राडा होण्याची शक्यता आहे.

मनसे आणि वंचितचा नेमका आरोप काय?

शिंदेंच्या शिवसेनेच्या उमेदवार एकता भोईर यांच्या प्रतिज्ञापत्रात शेवटचे पान आणि स्वाक्षरी नसतानाही त्यांचा अर्ज वैध ठरवला. तर प्रभाग क्रमांक 18 मधील मनसेच्या उमेदवार प्राची घाडगे या वेळेत उपस्थित असूनही त्यांना बाहेर थांबवल आणि अर्ज बाद केला. तसंच वंचितचे संदीप खरात, ठाकरेंच्या शिवेसनेचे अरविंद चव्हाण आणि अपक्ष राम एन्कुरे यांचे अर्ज देखील बाद करण्यात आले आहेत.

मात्र, शिवसेनेच्या उमेदवार शिल्पा वाघ यांच्या अर्जात रकाना रिकामा असूनही तो वैध ठरवण्यात आल्याचा आरोप अपक्ष उमेदवार राम एन्कुरे यांनी केला आहे. त्यामुळे निवडणूक अधिकारी सत्ताधाऱ्यांच्या बाजूने काम करत असून हा लोकशाही प्रक्रियेवर घाला असल्याचा आरोप मनसेने केला.

तसंच निवडणूक अधिकाऱ्यांच्या कारवाईच्या निषेधार्थ गुरुवारी प्रभाग 16, 17 आणि 18 च्या निवडणूक निर्णय अधिकाऱ्यांच्या कार्यालयात अर्ज बाद केलेले उमेदवार आमरण उपोषणाला बसणार असल्याची घोषणाही करण्यात आली आहे. त्यामुळे आता या सर्व प्रकरणावर नेमका काय तोडगा निघणार का? हे पाहणं महत्त्वाचं ठरणार आहे.