BMC Election 2026 : 'फडणवीस हे नाव मुंबईला माहिती नव्हतं तेव्हापासून आम्ही कोस्टल रोडची तयारी सुरु केलेय, भाजपने सुरू केलाय तो विकास नव्हे विनाश...'

Mumbai News, 11 Jan : मुंबई महानगरपालिकेच्या निवडणुकीला अवघे चार दिवस उरले आहेत. त्यामुळे राजकीय पक्षांनी प्रचाराचा जोरदार धडाका लावला आहे. तर पक्षाचे प्रमुख नेते विविध माध्यमांना मुलाखती देत आपली भूमिका मतदारांपर्यंत पोहचवत आहेत.

अशातच आता शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी एका मुलाखतीत बोलताना भाजपवर जोरदार हल्लाबोल केला आहे. या मुलाखतीत ठाकरेंनी मुंबईचा कोस्टल रोड आम्ही केल्याचा दावा करत देवेंद्र फडणवीस हे नाव मुंबईला माहिती नव्हतं तेव्हापासून आम्ही कोस्टल रोडची तयारी सुरु केली होती, असा टोला लगावला.

शिवाय मुंबईत विविध सेवा सुविधा आम्ही केल्या असून मुंबईच्या विकासात भाजपचा काडीचा संबंध नाही, अशा शब्दात ठाकरेंनी भाजपवर टीका केली. दरम्यान, या मुलाखतीत त्यांनी एकनाथ शिंदेची शिवसेना ही शाहसेना असून भाजपला मराठी मतं फोडायची होती म्हणून शिंदेंना फोडल्याचंही ठाकरे म्हणाले.

यावेळी भाजपकडून विकास आणि मराठी माणसांच्या मुद्द्यावरून होणाऱ्या टीकेवरही उद्धव ठाकरेंनी भाष्य केलं. ते म्हणाले, 'भाजपने जे सुरु केलं आहे तो विकास नव्हे तर विनाश आहे. आम्हाला विकास नको अशातला भाग नाही, पण नियोजन शून्य विकास हा मुंबईला विनाशाकडे घेऊन जात आहे. शिवसेना नसती तर भाजपला मंत्रालय दिसलं असतं का? असा सवाल केला.

ते म्हणाले, 'देवेंद्र फडणवीस, अमित साटम अगदी गद्दार असोत यांना महापालिका, मंत्रालय हे शिवसेनेने दाखवलं आहे. मंत्रिपद कुणी दिलं गद्दारांना? फडणवीस हे पहिल्यांदा कुणाच्या पाठिंब्याने मुख्यमंत्री झाले? आता जास्तीत जास्त सत्ता यांच्या हातात आहे. यांनी मराठी माणसांसाठी काय केलं? मराठी माणसाला घर नाकारणारे आता आम्हाला विचारतायत की आम्ही मराठी माणसांसाठी काय केलं? अशा शब्दात उद्धव ठाकरेंनी भाजपसह शिंदेंच्या शिवसेनेवर हल्लाबोल केला.