Dada Bhuse Controversy: शालेय शिक्षण मंत्र्यांची 'दादा'गिरी! महापालिकेच्या बंद पडलेल्या मराठी शाळेत थाटणार स्वतःच कार्यालय

Dada Bhuse Controversy: राज्यात सध्या शालेय शिक्षणावरुन बराच गदारोळ सुरु आहे. मराठीच्या शाळा बंद होत आहेत, हिंदी भाषेची सक्ती केली जात असल्याचे मुद्द्यांमुळं तणावाची परिस्थिती निर्माण झाली आहे. त्यातच नाशिकमधून एक धक्कादायक बाब समोर आली आहे. शालेय शिक्षण मंत्री दादा भुसे यांच्या दादागिरीची सध्या चर्चा सुरु आहे.

इथल्या एका महापालिकेच्या बंद पडलेल्या मराठी शाळेत शालेय शिक्षण मंत्र्यांच्या कार्यालयाचा प्रस्ताव ठेवण्यात आला आहे. महापालिका आयुक्त मनिषा खत्री यांनी या प्रस्तावाची माहिती दिली आहे, त्यामुळं दादा भुसे चांगलेच अडचणीत आले आहेत. साम टीव्ही न्यूजनं याबाबत वृत्त दिलं आहे.

काय आहे हा प्रस्ताव?

नाशिक महापालिकेची मराठी शाळा बंद असल्यानं त्याचा उपयोग कार्यालयासाठी करण्याचा हा प्रस्ताव आहे. विशेष म्हणजे हे कार्यालय थाटण्यासाठी जिल्हा नियोजन समितीच्या निधीतून १ कोटींचा खर्च दाखवण्यात आला आहे. ज्या शालेय शिक्षण मंत्र्यांनी मराठी शाळा कशा सुरू राहतील, महापालिका जिल्हा परिषद शाळांची पटसंख्या कशी वाढेल, मराठी शाळेतील शिक्षकांची आणि मुलांची गुणवत्ता कशी वाढेल यासाठी प्रयत्न करणं गरजेचं असताना उलट बंद पडलेल्या महापालिकेच्या मराठी शाळेत कार्यालयासाठी जागा मागितल्यानं शालेय शिक्षण मंत्र्यांच्या भूमिकेवर प्रश्नचिन्ह निर्माण झालं आहे.

सन २०१७ मध्ये विद्यार्थी पटसंख्या कमी झाल्यानं नाशिक महापालिकेची मराठी शाळा क्रमांक १६ बंद पडली. सध्या या बंद पडलेल्या मराठी शाळेत सर्व शिक्षा अभियानाचे कार्यालय आणि अंगणवाडीची शाळा सुरू आहे. दुरावस्था झालेल्या अंगणवाडीचा वर्ग तात्पुरत्या स्वरूपात भरतो आहे. पण या शाळेत दादा भुसे यांचं कार्यालय सुरु झाल्यास अंगणवाडीच्या वर्गाचं काय होणार? असा सवाल निर्माण झाला आहे. यासंदर्भातील प्रस्तावाला अद्याप मंजुरी दिली नसल्याचं महापालिका आयुक्तांची सांगितलं आहे.