Teachers Recruitment : पवित्र पोर्टलमार्फत शिक्षक भरतीसाठी आता नवा नियम; निवड प्रक्रिया झाली आणखी कडक...

Pavitra portal new rules : राज्यातील स्थानिक स्वराज्य संस्थांच्या शाळा तसेच खासजगी व्यवस्थापनांच्या शाळांमधील शिक्षक पदभरती टीईटी परीक्षेतील गुणांच्या आधारे पवित्र पोर्टलच्या माध्यमातून केली जाते. पदभरतीसाठी संबंधित व्यवस्थापनांना मुलाखतीशिवाय व मुलाखतीसह या दोन पर्यायांपैकी क पर्याय स्वीकारण्याची मुभा असते. मात्र, मुलाखतीसह या पर्याय निवडणाऱ्या संस्थांकडून योग्य मुल्यमापन न करताच उमेदवारांची निवड केली जात असल्याचे निदर्शनास आले आहे.

शिक्षणसंस्थांकडून मुलाखतीसह पदभरती प्रक्रियेत होत असलेल्या अयोग्य मुल्यमापनाच्या पार्श्वभूमीवर शालेय शिक्षण विभागाने महत्वपूर्ण निर्णय घेतला आहे. सर्व उमेदवारांच्या संपादणुकीचे व पात्रेतेचे योग्य मुल्यमापन व्हावे, यासाठी गुणदानाची प्रक्रिया निश्चित करणारी सुधारित मानक कार्यपध्दती लागू करण्यात आली आहे. यापुढील काळात त्यानुसारच पदभरती करण्याचे आदेश विभागाने काढले आहेत.

शिक्षक पदभरती प्रक्रियेची विश्वासार्हता वाढावी यासाठी मुलाखतीसह हा शिक्षक पदभरतीचा विकल्प स्वीकारणाऱ्या शैक्षणिक संस्थांनी त्यांना उपलब्ध करून देण्यात आलेल्या उमेदवारांपैकी सर्वाधिक योग्य उमेदवारांची निवड करण्यासाठी नवी गुणांकन प्रक्रिया अवलंबावी, असे आदेश देण्यात आले आहेत. सुधारित गुणांकन प्रक्रियेनुसार एकूण १०० गुणांपैकी सर्वाधिक गुण प्राप्त करणाऱ्या उमेदवारांची निवड करून त्यास नियुक्ती देणे क्रमप्राप्त राहील.

उमेदवारांना समसमान गुण प्राप्त झाल्यास ज्या उमेदवाराचे वय अधिक आहे, अशा उमेदवाराची निवड करून त्यास नियुक्ती द्यावी. उमेदवारांचे वय देखील सारख असल्यास इयत्ता बारावीचे गुण विचारात घेण्यात यावेत, असे शालेय शिक्षण विभागाने स्पष्ट केले आहे.

संबंधित शिक्षणाधिकारी किंवा शिक्षण उपसंचालकानी संबधित संस्थेस उपलब्ध करून देण्यात आलेल्या सर्व उमेदवारांचे योग्यप्रकारे गुणांकन झाले आहे किंवा कसे, याची खातरजमा करूनच उमेदवाराच्या निवडीस व नियुक्तीस मान्यता देण्यात यावी, असेही विभागाने नमूद केले आहे.

शिक्षण अभियोग्यता व बुध्दीमत्ता चाचणी २०२५ या परीक्षेतील व यापुढे होणाऱ्या अशा परीक्षेतील गुणांच्या आधारे शिक्षक पदभरतीसाठी प्रस्तावांतर्गत गुणांकन प्रक्रिया लागू राहणार आहे. त्यामुळे यापुढे मुलाखतीसह पर्याय निवडणाऱ्या शिक्षणसंस्थांना अत्यंत काटेकोरपणे नवा नियमांचे पालन करावे लागणार आहे.