Abhijeet Dipke : अमेरिकेत PM मोदींसोबत मिटींग झाल्याच्या फोटोवर अभिजीत दिपकेंचं स्पष्टीकरण; म्हणाले, "१५ दिवसांपूर्वी मी..."

Pune News, 11 Jun : कॉकरोच जनता पार्टीचे संस्थापक अभिजीत दिपके आणि पंतप्रधान नरेंद्र मोदी यांची अमेरिकेत मिटींग झाली आणि या दोघांमधील भेटीनंतरच दिपके भारतात आल्याचं वक्तव्य ठाकरेंच्या शिवसेनेचे खासदार संजय राऊत यांनी केलं आहे.

शिवाय आपण दिपके आणि मोदींच्या गुप्त भेटीचे फोटो बघितल्याचा खळबळजनक दावा देखील राऊतांनी केला आहे. आता राऊतांचा हाच दावा अभिजीत दिपके यांनी फेटाळून लावला आहे. "तो फोटो एआय जनरेटेड असू शकतो. मी मोदींना कसं भेटू शकतो? त्यांना भेटण्यासाठी प्रोटॉकॉल असतो, मी एक साधा विद्यार्थी आहे.", अशी प्रतिक्रिया दिपके यांनी दिली आहे.

अभिजीत दिपके नेमकं काय म्हणाले?

'संजय राऊतांना कोणीतरी तुमच्या आणि पंतप्रधान मोदींच्या भेटीचा फोटो पाठवला आहे. शिवाय या फोटोच्या सत्येतेबाबत आताच सांगता येणार नाही', असं राऊत म्हणाल्याचं पत्रकारांनी दिपके यांना सांगताच ते म्हणाले, "अरे बापरे मी आणि मोदी? मला माहिती नाही तो एआय जनरेटेड फोटो असू शकतो. मी मोदींना कसं भेटू शकतो? तुम्हाला प्रोटॉकॉल तुम्हाला माहिती आहेत.मी एक साधा विद्यार्थी आहे. १५ दिवसांपूर्वी मी यूएसमध्ये जॉबसाठी अप्लाय करत होतो.

अशी पार्टी काढण्याचा माझा काही हेतू नव्हता, जर तसा माझा प्लॅन असता तर मी तिकडे गेलो नसतो भारतात बसून हे सर्व केलं असतं. पण २ कोटींपेक्षा जास्त लोक एक प्लॅटफॉर्म तयार करतायत तर ते राजकीय पक्षांना काही इशारा देत आहेत आणि त्यांनी तुमच्याकडून आपेक्षा सोडल्या आहेत", असं दिपके यांनी म्हटलं आहे.

संजय राऊत काय म्हणाले?

"कॉकरोच जनता पार्टीचा संस्थापक अभिजीत दिपके आणि पंतप्रधान नरेंद्र मोदी यांची अमेरिकेत मिटींग झाली आणि त्या मिटींगनंतरच दिपके भारतात आहेत. या दोघांच्या भेटीचे फोटो मला एका व्यक्तीने पाठवले आहेत. शिवाय मोदींच्या भेटीनंतर दिपके भारतात आल्याचं लोक बोलत आहेत. याबाबतची माहिती आम्ही घेऊ", असं संजय राऊत यांनी म्हटलं आहे.