Ajit Pawar On Manikrao Kokate : माणिकराव कोकाटेंचे वक्तव्य मला महागात पडतं, अजितदादांनी दिली कबुली

Pune News : राज्याचे कृषिमंत्री माणिकराव कोकाटे यांच्याकडून सातत्याने वादग्रस्त विधान होताना पाहायला मिळत आहेत. एका कार्यक्रमांमध्ये बोलताना कोकाटे यांनी कृषिमंत्रीपद हे एका ओसाडगावची पाटीलकी असल्यासारखे आहे, असे म्हटले. त्यांच्या या विधानावरून त्यांच्यावर टीका होत आहे. दरम्यान, उपमुख्यमंत्री अजित पवार यांनी माध्यमांसमोरच कोकाटे यांचे कान टोचल्याचे पाहायला मिळाले.

कोकाटे यांनी एका कार्यक्रमादरम्यान मला अजित पवार यांनी जाणीवपूर्वक कृषी खातं दिलं आहे. आपल्याला कल्पना आहे की, कृषिमंत्री पद हे ओसाड गावची पाटीलकी आहे. तरीसुद्धा चांगलं काम करता येऊ शकतं हे सुद्धा उदाहरण आपल्याला राज्यात द्यायचं आहे. असे वक्तव्य केले.

कोकाटेंच्या या वक्तव्याबाबात पुण्यात माध्यमांनी अजित पवार यांना विचारले. त्यावेळी माणिकराव कोकाटे हे त्यांच्यासोबत होते. अजित पवार म्हणाले. 'मी यापूर्वी देखील कोकाटे यांना शेतकऱ्यांच्या बाबतीत असं वक्तव्य होऊ नये, असं सांगितले आहे. शेतकरी हा बळीराजा आहे तो लाखांचा पोशिंदा आहे.

सगळ्याच गोष्टी आम्हाला देखील माहिती आहेत. परंतु सगळ्याच गोष्टी बोलून कशाला दाखवायच्या. काही गोष्टी मनात देखील ठेवायच्या असतात. माणिकराव कोकाटे यांना अजून मनात ठेवायची सवय नाही त्यामुळे असं होत आहे. मात्र हे वक्तव्य फार महागात पडत असून मला ते फार जास्त महागात पडत आहे.'

...तर शस्त्र परवाना रद्द होणार

2021 ते 2023 च्या काळामध्ये पुणे शहरात मोठ्या प्रमाणात शस्त्रांचे परवाने देण्यात आले असल्याचा समोर आलs आहे. याबाबत बोलताना अजित पवार म्हणाले, त्यांच्याकडे शस्त्र प्रमाणे आहेत त्या सर्वांची आता आगामी काळामध्ये चौकशी करण्यात येणार आहे. यामध्ये ज्यांना खरंच शस्त्र-परवाण्याची आवश्यकता आहे. अशांचे शस्त्र परवाने हे कायम ठेवण्यात येणार असून ज्यांना शस्त्र परवान्याची आवश्यकता नाही, अशांचे शस्त्र परवाने रद्द करण्याचे कारवाई देखील करण्यात येणार आहे.