उदय सामंत हल्ला : बबनराव थोरातांना अटक; 'गद्दारांच्या गाड्या फोडा' वक्तव्य अंगलट

पुणे : मुख्यमंत्री एकनाथ शिंदे (Eknath Shinde) गटाचे आमदार उदय सामंत (Uday Samant) यांच्या ताफ्यावरील हल्ल्यानंतर पुणे पोलिस हायअलर्टवर आले आहेत. हल्ला झाल्यानंतर रात्रभर पोलिसांनी अटकसत्र राबवले असून शिवसेना नेते आदित्य ठाकरे यांच्या 'शिवसंवाद' सभेच्या आयोजकांसह ५ जणांना अटक करण्यात आली आहे. याशिवाय या हल्ल्याला चिथावणी देणारे वक्तव्य केल्याप्रकरणी हिंगोलीचे शिवसेना जिल्हा संपर्कप्रमुख बबनराव थोरात यांनाही ताब्यात घेण्यात आले आहे. अजूनही काही जणांना अटक होण्याची शक्यता आहे. (Uday Samant Attack in pune)

सोमवारी दुपारी शिवसेना पदाधिकारी व कार्यकर्त्यांचा निष्ठा मेळाव्यात शिवसेनाप्रमुखांच्या शिवसेनेशी गद्दारी करणाऱ्या गद्दारांच्या गाड्या तुमच्या गावात येताच तुम्ही फोडा, तुमचा 'मातोश्री'वर सन्मान करण्यात येईल, असे चिथावणीखोर वक्तव्य हिंगोलीचे शिवसेना जिल्हा संपर्कप्रमुख बबनराव थोरात यांनी केले होते. या प्रकरणी सचिन प्रकाश पवार यांनी हिंगोली शहर पोलिस ठाण्यात बबनराव थारोत यांनी शांतता भंग व्हावी, असे वक्तव्य केल्याची तक्रारही दाखल केली होती.

दरम्यान या हल्ल्यानंतर चिथावणीखोर वक्तव्य केल्याप्रकरणी बबनराव थोरात यांना काळाचौकी पोलिसांनी ताब्यात घेत, त्यांना पुण्यातील कोथरुड पोलिसांच्या ताब्यात दिले. कोथरूड पोलीस ठाणे येथे थोरात यांच्याविरोधात कलम 307, 353, 332, 109,143, 147, 148, 149, 427, 504, 506 भादवि सह कलम 37(1)(3), 135 मपोका. (भारती विद्यापीठ पोलीस ठाणे गु.र.क्र. 513/22) अन्वये दाखल केला करण्यात आला आहे.

काल मुख्यमंत्री एकनाथ शिंदे आणि आदित्य ठाकरे हे दोघेही पुणे दौऱ्यावर होते. संध्याकाळी आदित्य ठाकरे यांची कात्रज चौक भागात सभा होती. त्याचवेळी तिथून माजी मंत्री तानाजी सावंत यांच्या निवासस्थानामधून शिंदे आणि सामंत यांचा गाड्यांचा ताफा बाहेर पडला आणि मुंबईच्या दिशेने रवाना झाला. यावेळी सामंत यांचा ताफा कात्रज चौकात सिंग्नलला थांबला असतानाच शिवसैनिक आक्रमक झाले. त्यांनी सामंत यांच्या गाडीवर दगडफेक, चप्पलफेक केली आणि गद्दार..गद्दार, अशा घोषणा दिल्याची माहिती मिळत आहे.