Bhor Politics: भाजपाच्या मनसुबांना अजित पवारांचा दे धक्क! भोरमध्ये थोपटे मिळाले पण महत्त्वाचा मोहरा गळाला

Pune News : आगामी स्थानिक स्वराज्य संस्थांच्या निवडणुकांसाठी भाजपने पुणे जिल्ह्यामध्ये मिशन लोटस अॅक्टिव्हेट केला आहे. या अंतर्गत गेल्या काही दिवसांपासून पुणे जिल्ह्यात मोठमोठे प्रवेश भाजप घडून आणत आहे. महाविकास आघाडीमध्ये असलेले अनेक मातब्बर नेते सध्या भाजपने आपल्या गोटात घेत असून या नेत्यांच्या आधाराने उपमुख्यमंत्री अजित पवार यांच्या राष्ट्रवादीचे वर्चस्व असलेल्या पुणे जिल्हा भाजपला काबीज करायचा असल्याचं बोललं जात आहे.

विधानसभा निवडणुकीनंतर याच अंतर्गत भाजपने पुणे जिल्ह्यातून काही महत्त्वाचे प्रवेश घडून आणले असल्याचं बोललं जात आहे. यामध्ये माजी आमदार संजय जगताप आणि संग्राम थोपटे ही महत्त्वाची नाव आहेत. दोन्ही नेत्यांच्या आधारे भोर आणि पुरंदरमध्ये भाजपला आपली ताकद वाढवायची आहे. भोरमधून माजी आमदार संग्राम थोपटे हे भाजपात आल्याने भाजपची भोरमधील ताकद वाढली आहे, असं असलं तरी अनेकांना थोपटे यांचा भाजपमध्ये जाणं रुचलेलं नसल्याचे पाहायला मिळत आहे. यामधे भोरच्या माजी नगराध्यक्ष निर्मला आवारे यांचा देखील समावेश होता.

संग्राम थोपटे यांनी भाजपमध्ये प्रवेश केल्यानंतर अनेक काँग्रेसचे नेते भाजपमध्ये दाखल झाले. मात्र, निर्मला आवारे यांच्यासारखे काही नेते तटस्थ असल्याचे पाहायला मिळालं. आवारे या संग्राम थोपटे यांच्या निकटवर्ती असल्याने त्या त्यांच्यासोबतच भाजपमध्ये जातील असं सर्वांना वाटत होतं. मात्र, स्थानिक स्वराज्य संस्थांच्या निवडणुकीच्या पार्श्वभूमीवर आवारे यांनी आता उपमुख्यमंत्री अजित पवार यांच्या राष्ट्रवादीचे घड्याळ हातात बांधलं आहे.

हा संग्राम थोपटे आणि अनुषंगाने भाजपसाठी मोठा धक्का मानला जात आहे. आवारे या गेल्या दहा वर्षापासून भोर नगरपरिषदेमध्ये नगरसेवक होते तर मागील पाच वर्ष त्यांनी नगराध्यक्ष भूषवलं होतं. त्यांच्या या प्रवेशामुळे भोर शहरातील राष्ट्रवादी काँग्रेसची ताकद वाढली असल्याचे बोलले जात आहे. आगामी निवडणुकांमध्ये अशाच पद्धतीने भाजप आणि राष्ट्रवादी आमने-सामने टाकल्याचं पाहायला मिळाला आहे. आमदार शंकर मांडेकर यांच्या माध्यमातून हा प्रवेश घडून आणला गेला त्याचा देखील समोर आला आहे.