Ajit Pawar : भाजपची धास्ती! अजितदादांचे पदाधिकारी म्हणतात, 'यासाठी साहेब सोबत पाहिजेत...'

Pune News : एकेकाळी पुणे शहर आणि पुणे जिल्हा राष्ट्रवादी काँग्रेसचा बालेकिल्ला होता. सध्य परिस्थितीला जिल्ह्यामध्ये राष्ट्रवादीचे चांगले प्राबल्य असले तरी पुणे शहरामध्ये मात्र भाजपचाच बोलबाला असल्याचे पाहायला मिळत आहे. पुणे शहर भाजपचा गड बनला आहे. आणि हा गड भेदायचा असेल तर दादांसोबत साहेब देखील असले पाहिजेत, असा सूर काहीसा उपमुख्यमंत्री अजित पवार यांच्या पक्षातील काही पदाधिकाऱ्यांनी आवळला असल्याचे पाहायला मिळत आहे.

भाजपने 2017 ची महापालिका निवडणूक स्वबळावरती लढवली. त्यावेळी भाजपला मोठे बहुमत मिळाले. भाजपचे तब्बल 100 नगरसेवक पुणे महापालिकेत होते. दुसऱ्या नंबर वर 40 नगरसेवकांसह राष्ट्रवादी काँग्रेस राहिली तर शिवसेना आणि काँग्रेसला मात्र प्रत्येकी 10 जागांवर समाधान मानावे लागले होते. एवढं प्रचंड असे यश मिळवत भाजपने राष्ट्रवादी काँग्रेसच्या हातात असलेली सत्ता खेचून घेतली होती.

यंदा भाजपकडून पुणे महापालिकेचे सत्ता आपल्याकडे खेचून आणण्यासाठी राष्ट्रवादी काँग्रेस प्रयत्नशील आहे, असे असले तरी सध्या परिस्थितीला भाजपची पुण्यातील ताकद प्रचंड अशी वाढली आहे. लोकसभा निवडणुकीमध्ये भाजपने पुण्यात मोठा विजय साकारला. त्यानंतर झालेल्या विधानसभा निवडणुकीमध्ये देखील भाजपचे सहाच्या सहा आमदार निवडणूक जिंकले. त्यामुळे भाजपच्या नेत्यांचा आणि पदाधिकाऱ्यांचा मोठ्या प्रमाणात कॉन्फिडन्स वाढला आहे.

त्यामुळेच वरिष्ठ पातळीपासून खालच्या पदाधिकाऱ्यांपर्यंत पुणे महापालिकेची निवडणूक ही स्वबळावर लढवावी, याबाबत एकमत असल्याचे पाहायला मिळत आहे. महायुतीतील सगळेच पक्ष पुण्यामध्ये महायुती होण्याची शक्यता कमीच असल्याचे मानून स्वबळावर निवडणुकीच्या तयारीला लागल्या असल्याचे पाहायला मिळत आहे.

अशा परिस्थितीत जर भाजपच्या वाढलेल्या ताकदीबरोबर दोन हात करायची वेळ पडल्यास दोन्ही राष्ट्रवादी काँग्रेस एकत्र येण्याची गरज असल्याचे उपमुख्यमंत्री अजित पवार यांच्या राष्ट्रवादी काँग्रेसमधील काही पदाधिकाऱ्यांना वाटत आहे. काही पदाधिकारी उघड उघड आपले मत व्यक्त करत आहेत. तर काही पदाधिकारी खासगीत आपले म्हणणे अजित पवार आणि वरिष्ठ पदाधिकाऱ्यांपर्यंत पोहोचवताना पाहायला मिळत आहेत.

पुण्यामध्ये याच कारणामुळे पोस्टर लागले असल्याचे बोलले जात आहे. मुख्यमंत्री अजित पवार यांच्या पक्षाचे राष्ट्रवादी युवक उपाध्यक्ष असलेल्या करण गायकवाड यांनी पुणे शहरांमध्ये फ्लेक्स लावले आहेत. फ्लेक्समध्ये उपमुख्यमंत्री अजित पवार आणि राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांचा एकत्रित फोटो लावण्यात आला आहे. तसेच पुणे महानगरपालिका आपल्याकडे पाहिजे असेल तर, हे एकत्र हवेत, असे लिहिण्यात आले आहे.

राष्ट्रवादी काँग्रेसकडून निवडणूक लढवण्यासाठी इच्छुक असलेल्या उमेदवारांना आपल्या विजयाची हमी हवी आहे. त्यामुळे पुण्यामध्ये भाजपसारख्या बलाढ्य प्रतिस्पर्ध्याबरोबर ती दोन हात करण्यासाठी जास्तीत जास्त ताकद आपल्या सोबत हवी या दृष्टिकोनातून दोन्ही राष्ट्रवादींनी एकत्र यावे, यासाठी काही पदाधिकारी दादांना गळ घालताना पाहायला मिळत आहेत.