विजय शिवतारेंचा राजकीय वारस ठरला; ममता लांडेंकडे शिवसेनेची मोठी जबाबदारी!

सासवड शहर (जि. पुणे) : माजी राज्यमंत्री आणि पुरंदरचे शिवसेनेचे (shivsena) माजी आमदार विजय शिवतारे (Vijay Shivtare) यांनी आपला राजकीय वारस म्हणून कन्या डॉ. ममता लांडे-शिवतारे यांना पुढे आणले आहे. त्यांच्याकडे शिवसेनेच्या महिला आघाडीच्या जिल्हा समन्वयक पदाची जबाबदारी सोपवण्यात आली आहे. यानिमित्ताने शिवतारे यांचा राजकीय वारसा त्यांच्या कन्या डॉ. ममता लांडे याच चालविणारे असल्याचे स्पष्ट झाले आहे. (Dr. Mamta Lande is the political heir of Vijay Shivtare)

शिवसेनेच्या महिला आघाडीच्या जिल्हा समन्वयक म्हणून डॉ. ममता लांडे-शिवतारे या पुरंदर-हवेलीत पक्षाचे काम पाहणार आहेत. या पदाच्या माध्यमातून शिवतारे यांच्या कन्या ममता या राजकारणात सक्रीय झाल्या आहेत. समन्वयक या नात्याने त्या आता पुरंदर-हवेलीतील पक्षाचे महिला संघटना मजबूत करण्याची जबाबदारी आता शिवसेनेने त्यांच्याकडे दिली आहे. विजय शिवतारे हे मागील पंचवार्षिक निवडणुकीत याच मतदारसंघातून निवडून आले होते. मात्र, विधानसभेच्या २०१९ च्या निवडणुकीत त्यांचा पराभव झाला होता.

डॉ. ममता शिवतारे या दबंग पोलिस अधिकारी शिवदीप लांडे यांच्या पत्नी आहेत. शिवतारे यांच्या स्वामी समर्थ शुगर इंडस्ट्रीजच्या व्यवस्थापकीय संचालक म्हणूनही त्या काम पाहतात. आगामी स्थानिक स्वराज्य संस्थांची निवडणुकीच्या पार्श्वभूमीवर पक्षाने त्यांच्याकडे ही जबाबदारी सोपवली आहे. आरक्षणामुळे महिलांना पन्नास टक्के जागांवर निवडणूक लढण्याची संधी मिळणार आहे, त्यामुळे पक्षाने महिला संघटन मजबूत करण्याचे हेतूने ममता शिवतारे यांच्याकडे ही मोहीम सोपवली आहे.

दरम्यान, ममता शिवतारे यांच्यासोबत पुरंदरमधील ॲड. गीतांजली ढोणे यांनाही शिवसेनेच्या महिला आघाडीच्या जिल्हा समन्वयक करण्यात आले आहे. ढोणे या पुरंदर तालुक्यातील नामांकित वकील आहेत. गराडे या ग्रामपंचायतीच्या त्या सदस्यही आहेत. पुरंदरच्या पश्चिम भागातील शेतकऱ्यांची सावकारी जाचातून सुटका करणे, त्यांना न्याय मिळवून देणे अशा कामांत त्या नेहमी अग्रेसर राहिल्या आहेत. गीतांजली ढोणे यांचे पती विजय ढोणे हे माजी राज्यमंत्री शिवतारे यांचे निष्ठावंत मानले जातात. पुरंदर तालुका महिला संघटकपदी काळेवाडी-दिवे येथील वैशाली बाजीराव काळे यांची नेमणूक करण्यात आली आहे.