Ajit Pawar : जैन मुनींनी अजितदादांना फटकारलं : नाराजी दूर करण्यासाठी अण्णा बनसोडेंची धावाधाव

Pune News : पुण्यातील जैन बोर्डिंग होस्टेलच्या जमीन विक्रीच्या प्रकरणावरून राजकारण चांगलेच तापले आहे. या प्रकरणांमध्ये उपमुख्यमंत्री एकनाथ शिंदे यांच्या शिवसेनेचे महानगर प्रमुख रवींद्र धंगेकर यांच्याकडून भाजप खासदार आणि केंद्रीय मंत्री मुरलीधर मोहोळ यांच्यावर सातत्याने टीका होताना पाहायला मिळत आहे. त्यातच आता जैन मुनी यांनी सोमवारी पालकमंत्री अजित पवार यांच्याबद्दल नाराजी व्यक्त केली. त्यानंतर विधानसभेचे उपाध्यक्ष अण्णा बनसोडे यांनी तातडीने जैन मुनींची भेट घेत नाराजी दूर करण्याचा प्रयत्न केला.

पुणे शहराच्या मध्यवर्ती ठिकाणी असलेले कोट्यावधींची जमीन काही कोटींमध्ये गोखले बिल्डर यांनी हडपल्याचा आरोप रवींद्र धंगेकर यांच्याकडून करण्यात येत होता. तसेच या व्यवहारांमध्ये केंद्रीय मंत्री मुरलीधर मोहोळ यांची मदत गोखले यांना झाली असल्याचा आरोप देखील धंगेकर यांच्याकडून करण्यात येत होता. मात्र, या प्रकरणात उपमुख्यमंत्री अजित पवार (Ajit Pawar) जैन समाजाबरोबर पक्षपात आणि अन्याय करत असल्याबद्दल त्यांच्याविषयी नाराजी व्यक्त केली जात आहे.

पुण्याचे पालकमंत्री असलेले अजित पवार अद्याप या प्रकरणामध्ये काही बोललेले नाहीत. याठिकाणी आलेले नाहीत, हे अत्यंत चुकीचे आहे. 17 ऑक्टोबरला काढलेल्या मोर्चापूर्वीच आम्ही पालकमंत्री अजित पवार यांना आमचे म्हणणं पाठवलं होते. मात्र त्यांच्यापर्यंत हे सर्व पोहचून देखील ते का आले नाहीत, याबाबत आम्हाला काही कल्पना नाहीये, अशी नाराजी जैन मुनींनी व्यक्त केली. जैन मुनी यांनी सोमवारी पालकमंत्री अजित पवार यांच्याबद्दल नाराजी व्यक्त केली. त्यानंतर विधानसभेचे उपाध्यक्ष अण्णा बनसोडे (Anna Bansode)यांनी तातडीने जैन मुनींची भेट घेतली.

अजित पवार या भागाचे पालकमंत्री असल्याने त्यांच्या कार्यक्षेत्राखाली असलेल्या भागांमध्ये कोणावर अन्याय होऊ नये, हे पाहणे त्यांचं काम आहे. तसेच या प्रकरणामध्ये अजित पवार यांनी ब्र शब्द देखील काढलेला नाही. ते जैन समाजासोबत पक्षपात आणि अन्याय करत आहेत. त्यांनी येऊन समाजासोबत उभं राहणं आवश्यक आहे, अशी अपेक्षा जैन मुनींनी व्यक्त केली.

दरम्यान, जैन मुनींची भेट घेतल्यानंतर प्रसार माध्यमाशी बोलताना अण्णा बनसोडे म्हणाले की, 'येत्या काळात लवकरच उपमुख्यमंत्री अजित पवार हे जैन मुनींची भेट घेणार आहेत. या जैन बोर्डिंग जमीन प्रकरणाचा आढावा आम्ही अजितदादांना देणार आहोत. त्यासोबतच जैन बांधवांच्या पाठीशी त्यांची मागणी मान्य होईपर्यंत आम्ही ठामपणे उभे राहणार असल्याचे त्यांनी सांगितले.