Amol Balwadkar : पुण्यात श्वास रोखणारा थरार : अमोल बालवडकरांना मध्यरात्री 2 वाजता विजयी घोषित; भाजपने शेवटपर्यंत लावला जोर

Amol Balwadkar : पुण्यात प्रभाग क्रमांक 9 बाणेर-पाषाण-सूस इथल्या अत्यंत अटीतटीच्या ठरलेल्या लढतीमध्ये राष्ट्रवादी काँग्रेसचे उमेदवार अमोल बालवडकर यांचा विजय झाला. त्यांनी 903 मतांनी भाजपचे उमेदवार लहू बालवडकर यांचा पराभव केला. मध्यरात्री 2 वाजेपर्यंत इथली मतमोजणी प्रक्रिया सुरु होती. भाजपने शेवटपर्यंत जोर लावून देखील लहू बालवडकर यांचा विजय खेचून आणू शकले नाहीत.

प्रभाग क्रमांक 9 मध्ये अमोल बालवडकर विरुद्ध लहू बालवडकर यांच्यामध्ये अत्यंत अटीतटीची लढत बघायला मिळाली. 8 व्या फेरीअखेर लहू बालवडकर यांची अमोल बालवडकर यांच्यावर 1135 मतांची आघाडी होती. पण 9 व्या फेरीमध्ये अमोल यांनी ही आघाडी तोडत विजयाकडे वाटचाल केली. त्यानंतरही भाजपकडून 7, 8 आणि 9 व्या फेरीच्या फेरमतमोजणीची मागणी घेण्यात आली.

सुरुवातीला निवडणूक निर्णय अधिकाऱ्यांनी केवळ 9 व्या फेरीच्या मतमोजणीची मागणी मान्य केली. मात्र भाजपकडून अत्यंत आक्रमकपणे मागणी लावून धरण्यात 12 वाजून 45 मिनिटांच्या दरम्यान आल्यानंतर 7 आणि 8 व्या फेरीच्या फेरमतमोजणीची मागणी मान्य झाली. रात्री एक वाजता ही फेरमतमोजणी सुरु झाली. या फेरमतमोजणीमध्ये उलट अमोल बालवडकर यांचे मताधिक्य वाढले.

नियमित मतमोजणी संपली तेव्हा अमोल बालवडकर 650 मतांनी आघाडीवर होते. तर तिन्ही फेऱ्यांची फेरमतमोजणी संपली तेव्हा त्यांना 903 मतांनी विजयी घोषित करण्यात आले. रात्री जवळपास 1 वाजून 45 मिनिटांनी बालवडकर यांच्यासह प्रभाग क्रमांक 9 मधील भाजपच्या रोहिणी चिमटे, राष्ट्रवादी काँग्रेसचे बाबुराव चांदेरे, भाजपच्या मयुरी कोकाटे यांनाही विजयी घोषित करण्यात आले.

अमोल बालवडकर यांचे भाजपने उमेदवारी अर्ज भरण्याच्या अखेरच्या दिवशी तिकीट कापले होते. त्यानंतर त्यांनी उपमुख्यमंत्री अजित पवार यांची भेट घेऊन शेवटच्या एका तासात राष्ट्रवादी काँग्रेसमध्ये प्रवेश केला आणि लगेचच उमेदवारी जाहीर झाली. भाजपचे नेते चंद्रकांत पाटील यांच्यासोबत विधानसभा निवडणुकीमध्ये पंगा घेतल्यानेच अमोल यांची उमेदवारी कापण्यात आल्याची चर्चा होती.