NCP On Mahesh Landge: 'पैलवानकी'ची आठवण करुन देत अजितदादांनाच ललकारणाऱ्या लांडगेंना NCP चा करारा जवाब; 'लंगोटी घालायला...'

Pune News : आगामी काळात होत असलेल्या स्थानिक स्वराज्य संस्थांच्या निवडणुकीला सामोरे जाण्यासाठी सर्वच राजकीय पक्षांनी जोरदार तयारी सुरू केली आहे. अशातच आता पिंपरी-चिंचवड महानगरपालिका निवडणुकांच्या घोषणेआधीच भाजप आणि राष्ट्रवादी काँग्रेसमध्ये श्रेयवादाची जोरदार लढाई सुरू झाली आहे. याचदरम्यान,भाजपचे भोसरी मतदारसंघाचे आमदार महेश लांडगे यांनी उपमुख्यमंत्री अजित पवार (Ajit Pawar) यांच्यावर अप्रत्यक्षपणे हल्ला चढवत त्यांना ललकारलं होतं. त्याला आता राष्ट्रवादी काँग्रेसकडून प्रत्युत्तर दिले आहे.

पिंपरी चिंचवडमध्ये मुख्यमंत्री देवेंद्र फडणवीसांच्या समोर भाजप आमदार महेश लांडगे यांनी 'मी पैलवान आहे,कोणालाही घाबरत नाही.समोरच्याला अंगावर घेण्याची सवय आहे',असे म्हणत अप्रत्यक्षपणे अजित पवारांनाच आव्हान दिले होते.याच टीकेला आता राष्ट्रवादीचे प्रवक्ते उमेश पाटील यांनी पलटवार केला आहे.

उमेश पाटील म्हणाले, तुमचा वस्ताद अजितदादा, त्यांनीचं तुम्हाला लंगोट घालायला शिकवली, तुमचा वस्ताद अजितदादा आहे अन त्यांनीच तुम्हाला लंगोट घालायला शिकवली,तेव्हा कुठं तुम्ही पैलवान झाले.हे विसरु नका असा घणाघात केला आहे. तसेच वस्ताद शेवटी एक डाव राखून ठेवतो असा खणखणीत इशाराही राष्ट्रवादीचे प्रवक्ते त्यांनी दिला.

भाजपचे भोसरी मतदारसंघाचे आमदार महेश लांडगे (Mahesh Landge) यांनी उपमुख्यमंत्री अजित पवार यांच्यावर अप्रत्यक्षपणे निशाणा साधत मुख्यमंत्री देवेंद्र फडणवीस यांच्यापुढे तक्रारीचा पाढा वाचला. 'मी पैलवान आहे, कोणालाही घाबरत नाही. समोरच्याला अंगावर घेण्याची सवय आहे,' असे म्हणत अप्रत्यक्षपणे महेश लांडगे यांनी अजित पवारांनाच आव्हान दिले असल्याचे बोलले जात आहे.

गेल्या पाच वर्षांत पिंपरी-चिंचवडमध्ये झालेला विकास भाजपच्या नेतृत्वाखाली झाला असून, त्याचे श्रेय अजित पवार यांच्या पक्षाकडून घेतले जात असल्याची टीका अप्रत्यक्षपणे महेश लांडगे यांनी केली.

भाजपला 2017 मध्ये पालिकेची सत्ता मिळाल्यानंतर अनेक विकासकामे मार्गी लागली.दिव्यांग भवनसुद्धा त्याचाच एक भाग आहे.या विकासामध्ये आमचेही योगदान मोठे आहे.इतरांचे योगदान नाकारत नाही, पण आमचे योगदानही दुर्लक्षित होता कामा नये ,असेही लांडगे यांनी म्हटलं.

शहरातल्या नागरिकांनी जर तुमच्याकडे सत्ता दिली नसती तर काय केले असते? देवळात जाऊन घंटा वाजवत बसले असते का? असा सवाल महेश लांडगे यांनी उपस्थित केला.गेली 30 वर्षे काय केले असे ते येऊन सांगतायत, ते आम्ही नाकारत नाही. मात्र, आम्ही पण 2017 पासून विकास केलेला आहेच ना? हे कसे काय नाकारता, असा सवालही महेश लांडगे यांनी विरोधकांना केला होता.

शहराच्या विकासासाठी भाजपने पारदर्शक कारभार केला असून, विरोधकांच्या टीका केवळ श्रेय घेण्यासाठी असल्याचे लांडगे म्हणाले. 'आम्ही काम केले तर तो भ्रष्टाचार, आणि इतरांनी केले तर तो विकास असे का?" असा सवालही त्यांनी उपस्थित केला. त्यासोबतच त्यांनी संतसृष्टी, आयुक्तालय या मुद्द्यावरही त्यांनी अजित पवार यांच्यावर टीका केली.

अजित पवारांनी मंगळवारी भोसरीत येऊन भाजपच्या भ्रष्टाचारावर बोट ठेवलं. त्यांनतर दुसऱ्याचं दिवशी मुख्यमंत्री देवेंद्र फडणवीस यांच्यासमोर महेश लांडगेंनी अजित पवारांविरोधात शड्डू ठोकले. मी पैलवान आहे, कोणाला घाबरत नाही, मला अंगावर घेण्याची सवय आहे. अशी आक्रमक भाषा वापरली. मग मुख्यमंत्र्यांनी ये पब्लिक है, ये सब जाणती है. असं म्हणत लांडगेंना सबुरीचा सल्ला दिला होता.