Nitesh Rane Gogawale tea offer : 'मर्डर'चा उल्लेख करणाऱ्या गोगावलेंना नितेश राणेंनी दिली चहाची ऑफर, म्हणाले, 'त्यांचे ज्ञान...'

Pune News : उपमुख्यमंत्री एकनाथ शिंदे नेतृत्व करत असलेल्या शिवसेनेचे नेते भरत गोगावले यांनी भाजप नेते नारायण राणे यांच्याबाबत खळबळजनक वक्तव्य केले आहे. राणे यांनी अनेक भानगडी केल्या, मर्डर केले. त्यामुळे ते या उंचीवर पोहोचले आहेत, असे खळबळजनक विधान भरत गोगावले यांनी केले होते. या विधानानंतर भाजप नेते आणि नारायण राणे यांचे पुत्र नितेश राणे यांनी भरत गोगावले यांना उत्तर दिले आहे.

कुडाळ पावशी येथे शनिवारी सायंकाळी शिंदे यांच्या शिवसेनेचा (Shivsena) सिंधुदुर्ग जिल्हा कार्यकर्ता मेळावा बैठक पार पडली. या बैठकीला कोकणातील शिंदे यांच्या सेनेचे अनेक दिग्गज नेते उपस्थितीत होते. या बैठकीदरम्यान बोलताना भरत गोगावले म्हणाले, 'नारायण राणे राजकारणात एवढ्या उंचीवर सहजासहजी गेलेले नाहीत. त्यांनी अनेक भानगडी केल्या, तुरुंगात गेले, मर्डर केले,' असे खळबळजनक विधान गोगावले यांनी केले होते.

दरम्यान, रविवारी नितेश राणे (Nitesh Rane) हे पुणे दौऱ्यावर होते. त्यांनी या दौऱ्या दरम्यान पुण्यातील जगन्नाथ यात्रेला त्यांनी उपस्थिती लावली. त्यानंतर माध्यमांशी संवाद साधला. नितेश राणे म्हणाले, 'या कार्यक्रमाला आमंत्रण दिले आणि आरतीचा मला मान मिळाला, याबाबत मी आयोजकांचे आभार मानतो.'

भगवतगीतेमध्ये ताकद आहे. गीता कधीही कोणाचाही द्वेष करणे शिकवत नाही. धर्मांतर करून स्वतःचा धर्म वाढवा, असे गीतेमध्ये लिहिलेले नाही. त्यामुळे गीतेचा प्रचार प्रसार सगळीकडे झाला पाहिजे. मग तो मोहल्यांमध्ये झाला तर त्या ठिकाणच्या लोकांच्या विचारात देखील परिवर्तन होईल आणि आपले हिंदू राष्ट्र अधिक भक्कम होईल, असे नितेश राणे म्हणाले.

भरत गोगावले यांनी केलेला विधानाबाबत विचारले असता नितेश राणे म्हणाले, 'मी त्यांचे भाषण ऐकलेले नाही. मात्र, नारायण राणे हे महाराष्ट्राचे मुख्यमंत्री राहिले आहेत. मर्डर केसबाबतचे कोणतेही पोलीस रेकॉर्ड नाही. कदाचित गोगावले यांना पूर्ण माहिती नसेल. त्यामुळे आज चहापाण्याच्या निमित्ताने ते जेव्हा माझ्या शेजारी उभे असतील. तेव्हा थोडा चहा त्यांना माझ्यावतीने देतो आणि त्यांच्या ज्ञानात भर टाकतो.'

नारायण राणे यांनी शिवसेना वाढवली. नारायण राणे हे शिवसेनेच्या प्रत्येक शिवसैनिकाबरोबर राहिले म्हणूनच बाळासाहेब ठाकरे यांनी त्यांना मुख्यमंत्री केले. गोगावले हे त्यांचे जुने सहकारी आहेत. मात्र, कदाचित त्यांना संपूर्ण माहिती नसेल ते मला भेटल्यानंतर मी त्यांच्या ज्ञानात भर टाकेल, असा टोला नितेश राणे यांनी लगावला.

हा देश बाबासाहेब आंबेडकर यांच्या संविधानाने चालतो संविधानानुसार कोणतीही मर्डर केस नारायण राणे यांच्यावर नाही. त्यामुळे हे राजकीय आरोप-प्रत्यारोप हे असेच सुरू असतात, असेही नितेश राणे म्हणाले.