Baramati Bypoll : पोटनिवडणुकीवर पार्थ पवार पहिल्यांदाच बोलले अन् दिला करारा जवाब; म्हणाले, काय त्रास होईल, ते दिसेल...

Baramati election news 2026 : बारामती विधानसभा मतदारसंघाच्या पोटनिडणुकीसाठी राष्ट्रवादी काँग्रेसकडून उपमुख्यमंत्री सुनेत्रा पवार यांनी आज उमेदवारी अर्ज दाखल केला. त्यांच्याविरोधात काँग्रेसने आकाश मोरे यांना उमेदवारी दिली आहे. काँग्रेस वगळता अन्य सर्वच पक्षांनी ही निवडणूक बिनविरोध व्हावी, यासाठी आग्रह धरला होता. पण काँग्रेसने माघार घेतली नाही. उमेदवारी अर्ज मागे घेण्याच्या अखेरच्या दिवसापर्यंत बिनविरोधसाठी प्रयत्न केला जाणार आहे.

काँग्रेसच्या भूमिकेवरून मात्र अनेकांनी टीका केली आहे. राष्ट्रवादी काँग्रेसचे नेते व राज्यसभेचे नवनियुक्त खासदार पार्थ पवार यांनी काँग्रेसच्या भूमिकेवर संताप व्यक्त केला आहे. आई सुनेत्रा पवार यांचा उमेदवारी अर्ज दाखल करण्यापूर्वी पार्थ यांनी मीडियाशी संवाद साधताना काँग्रेसला सूचक इशाराच दिला आहे. पोटनिवडणुकीबाबत त्यांनी उघडपणे पहिल्यांदाच भाष्य केले आहे.

काय म्हणाले पार्थ पवार?

पोटनिवडणूक बिनविरोध व्हावी, यासाठी काँग्रेसच्या नेतृत्वासोबत बोलणार का, या प्रश्नावर बोलताना पार्थ पवार म्हणाले, कुणासोबतही बोलणे झालेले नाही. काय करायचं, ते त्यांना कळायला हवे. ते काय करत आहेत, ते सगळ्यांना माहिती आहे. सगळे मोठे लोकं आहेत, सगळ्यांना समजतं, काय चाललंय. त्यांनी विचार केला असेल, त्यांना करू द्या. पण त्यांना नंतर काय त्रास होईल महाराष्ट्रात ते दिसेल, असा संताप पार्थ यांनी व्यक्त केला.

लोक विसरत नाहीत. लोकांच्या मनात दादांविषयी प्रेम आहे. अशा वेळेस एवढ्या मॅच्युअर पक्षाने हा निर्णय घेणे, जिथे एवढे मोठे नेते आहेत, ते अतिशय चुकीचे आहे, अशी नाराजी पार्थ यांनी व्यक्त केली. आपण कोणाला थांबवू शकत नाही. जशी वेळ येते, तसे सामोरे जावे लागते. आम्ही सामोरे जाऊ, असेही पार्थ पवारांनी स्पष्ट केले.  

आम्ही कोणाला फोन करणार नाही. जे काय नशिबात लिहिलंय ते बघू. फक्त मला वाईट वाटतंय की, महाराष्ट्रात काँग्रेसचा डाऊनफॉल आहे, असा सूचक इशाराही पार्थ पवार यांनी दिला. दरम्यान, सुनेत्रा पवार यांचा उमेदवारी अर्ज दाखल करण्यासाठी राष्ट्रवादी काँग्रेसचे सर्व प्रमुख नेते आज बारामतीत दाखल झाले होते. त्याचप्रमाणे उपमुख्यमंत्री एकनाथ शिंदे हेही उपस्थित होते.