राम कदमांनी प्रार्थना देवाकडे नव्हे; मोदींकडे करावी

मुंबई : अमंली पदार्थ सेवन प्रकरणात अडकलेला स्टारपुत्र आर्यन खानला जामीन मिळावा अशी देवाकडे प्रार्थना करणारे भाजपा आमदार राम कदम यांनी देशातील कोट्यवधी सर्वसामान्य तरुणांच्या भल्यासाठी देखील देवाकडे नव्हे तर पंतप्रधान नरेंद्र मोदी यांच्याकडे प्रार्थना करावी, असा टोला मागठाण्याचे शिवसेना आमदार प्रकाश सुर्वे यांनी लगावला आहे.

गेले अनेक दिवस कोठडीत असलेला आर्यनखान याला जामीन मिळावा अशी मी देवाकडे प्रार्थना करतो, असे ट्विट आमदार राम कदम यांनी आज सकाळी केले होते. याप्रकरणी सुर्वे यांनी आमदार कदम यांना टोला लगावला आहे. देशातील कोट्यवधी तरुणांसाठी कदम यांनी देवापेक्षा पंतप्रधान नरेंद्र मोदी यांच्याकडे प्रार्थना केल्यास ती निश्चितच फळाला येईल,असेही सुर्वे यांनी म्हटले आहे.

आर्यन खान याच्या जामिनासाठी कदम यांनी देवाकडे प्रार्थना केली ही चांगलीच गोष्ट आहे. सर्वांचे भले व्हावे अशी इच्छा करणारी, विश्वाचे कल्याण इच्छिणारी आपली हिंदू संस्कृती असून त्यानुसारच कदम यांनी ही मागणी केली आहे. त्यामुळे कदम यांच्या या मागणीला कोणाचाही विरोध नसेल, असेही सुर्वे यांनी म्हटले आहे.

मात्र, जो जे वांछील तो ते लाहो, या श्लोकाप्रमाणे देशातील कोट्यवधी तरुणांचे हित व्हावे यासाठीही कदम यांनी देवाकडे प्रार्थना केल्यास आपणही त्यात सहभागी होऊ, असेही सुर्वे म्हणाले. अर्थात अशी प्रार्थना कोणत्याही देवापेक्षा पंतप्रधान नरेंद्र मोदींकडे केल्यास तिला जास्त चांगली फळे मिळतील, हेदेखील कदम यांनी ध्यानात ठेवावे. जगात तरुणांची सर्वात जास्त लोकसंख्या भारतात असून ती देशाची मोठी शक्ती आहे. त्या तरुणांना रोजगार मिळूदे, त्यांची आर्थिक भरभराट होऊदे, त्यांना व्यसनांचा स्पर्शही न होऊदे, या मागण्या नरेंद्र मोदींकडेच करायला हव्यात. त्या इच्छा खऱ्या करण्याची ताकद देवापेक्षा नरेंद्र मोदींकडेच आहे, हे ही कदम यांनी यापुढे लक्षात ठेवावे, असेही सुर्वे यांनी म्हटले आहे.

Edited By : Umesh Ghongade