kolhapur News: पुणे पदवीधर विधानसभा मतदारसंघासाठी महायुतीमधील सर्वच पक्षांनी कंबर कसली आहे. पुणे पदवीधर मतदारसंघाचे नेतृत्व सध्या राष्ट्रवादी शरदचंद्र पवार गटातील अरुण लाड करीत आहेत. महायुतीमध्ये ही जागा भाजपकडे आहे. भाजपच्या या जागेवर राष्ट्रवादीने आतापासूनच दावा केला आहे.
वैद्यकीय शिक्षण मंत्री हसन मुश्रीफ यांनी भैय्या माने हा यांचे नाव जाहीर केले आहे. तर दुसरीकडे भाजपकडून आमदार अरुण बापू लाड यांना भाजपमध्ये घेऊन त्यांचे चिरंजीव शरद लाड यांना उमेदवारीची घोषणा करू शकते. डिसेंबर 2026 मध्ये ही निवडणूक होणार असून आतापासूनच रंगत आली आहे.
पुणे पदवीधर मतदारसंघाच्या निवडणुकीत राष्ट्रवादी काँग्रेसमधून वैद्यकीय शिक्षण मंत्री हसन मुश्रीफ यांचे कट्टर समर्थक भैय्या माने, शिवसेना उद्धव बाळासाहेब ठाकरे यांच्या पक्षातून कोल्हापूर शहराध्यक्ष सुनील मोदी आणि भाजपकडून सध्या उमेदवार नसला तरी त्यांचा या मतदारसंघातील उमेदवारीवर दावा आहे. शिवाय शरद लाड यांना देखील उमेदवारी देण्याची शक्यता आहे. मतदारसंघातील पाचही जिल्ह्यांतून इच्छुकांनी दौरे सुरू केले आहेत. नुकताच मुख्य निवडणूक अधिकाऱ्यांनी पदवीधर आणि शिक्षक मतदारसंघातील मतदार यादी तयार करण्याचा कार्यक्रम जाहीर केला आहे.
पुणे पदवीधर मतदारसंघाचे नेतृत्व सध्या राष्ट्रवादी शरदचंद्र पवार गटातील अरुण लाड करीत आहेत. आगामी निवडणूक त्यांनी लढविली नाही, तर त्यांच्या ठिकाणी उमेदवारी मिळवण्यासाठी शिवसेना उद्धव बाळासाहेब ठाकरे पक्षाचे कोल्हापूर शहरप्रमुख सुनील मोदी इच्छुक आहेत. पक्षाने त्यांची पुणे पदवीधर मतदारसंघाच्या ‘समन्वयपदी’ नियुक्ती केली आहे. त्यांना या निवडणुकीचा अनुभव आहे. त्यामुळे त्यांनी इच्छुक असल्याचे पक्षश्रेष्ठींना सांगितले आहे. सध्यातरी पक्षाच्यावतीने पाच जिल्ह्यांतील मतदारांची नोंदणी त्यांच्याकडून सुरू आहे.
जिल्ह्यातील राष्ट्रवादी काँग्रेस पक्षाचे (अजित पवार गट) कागल येथील पदाधिकारी भैय्या माने यांनीही यापूर्वीच मतदार नोंदणीची मोहीम सुरू केली आहे. पक्षाकडून त्यांना उमेदवारी मिळेल, असा विश्‍वास आहे. वैद्यकीय शिक्षण मंत्री हसन मुश्रीफ यांनीच त्यांच्या नावाची घोषणा केली आहे. महायुतीकडून उमेदवारीसाठी त्यांचे प्रयत्न सुरू आहेत.
भाजपकडूनही नोंदणी प्रक्रिया गतिमान केली आहे. २७ सप्टेंबरला पुण्यात पुणे पदवीधरबाबत बैठकीचे आयोजन केले आहे. यामध्ये उच्च व तंत्रशिक्षण मंत्री चंद्रकांत पाटील यांच्या प्रमुख उपस्थितीत बैठक होत आहे. सध्या कोल्हापूरच्या राहुल चिकोडे यांना पुणे पदवीधर मतदारसंघासाठी सहनोंदणी प्रमुखपद दिले आहे. त्यांच्याकडे कोल्हापूर आणि सांगली जिल्ह्याची जबाबदारी दिली आहे. सर्वात अधिक नोंदणी ज्यांच्याकडून होईल त्यांना उमेदवारी मिळण्याची शक्यता आहे. यापूर्वी चिकोडे यांनी पुणे पदवीधरमध्ये काही जबाबदाऱ्या पार पाडल्या आहेत. त्यामुळे त्यांनाही या निवडणुकीतील प्रचाराचा अनुभव आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.