NCP Alliance: राष्ट्रवादीच्या गोटातून महत्त्वाची अपडेट..! चर्चा अंतिम टप्प्यात,येत्या दोन दिवसांत मोठा निर्णय होणार

Pune News : आगामी महापालिका निवडणुकीच्या पार्श्वभूमीवर दोन्ही राष्ट्रवादी काँग्रेस एकत्र येऊन निवडणुका लढवणार असल्याच्या चर्चा केल्या काही दिवसांपासून सुरू आहेत. या चर्चांना दोन्ही पक्षातील वरिष्ठ नेत्यांनी अधिकृत दुजोरा देखील दिला असल्याचं पाहायला मिळतंय. मात्र दोन्ही राष्ट्रवादी काँग्रेसच्या एकत्र येण्यास काही नेते अनुकूल नसल्याचे देखील चित्र पाहायला मिळाला आहे. त्या पार्श्वभूमीवर दोन्ही राष्ट्रवादीच्या आघाडीचं काय होणार याकडे संबंध महाराष्ट्राचे लक्ष लागले आहे.

अशातच आता राष्ट्रवादीच्या माजी महापौराने दोन दिवसांमध्ये दोन्ही राष्ट्रवादी एकत्र येण्याबाबतची घोषणा होणार असल्याचा चर्चेला दुजोरा दिला आहे. अजित पवार यांच्या राष्ट्रवादीचे नेते आणि माजी महापौर दत्ता धनकवडे यांनी ही माहिती दिली आहे. उपमुख्यमंत्री अजित पवार यांच्या भेटीनंतर दत्ता धनकवडे यांनी दोन्ही राष्ट्रवादीच्या आघाडी संदर्भात केलं मोठं वक्तव्य केलं आहे.

याबाबत बोलताना दत्ता धनकवडे म्हणाले, दोन्ही राष्ट्रवादी एकत्र येणार आहेत. याची चर्चा पूर्ण झाली आहे. फक्त घोषणा होणे बाकी आहे. ती घोषणा लवकरच होईल. त्या माध्यमातून लवकरच चांगली बातमी आपल्याला मिळणार आहे असं धनकवडे म्हणाले.

पुढील दोन दिवसांमध्ये दोन्ही राष्ट्रवादीच्या युतीची घोषणा होणार आहे.दोन्ही पक्षाच्या नेत्यांचे यासंदर्भात बोलणे झालेले असून याबाबतची घोषणा दोन्ही पक्षातील नेते लवकरच करणार आहेत. काँग्रेस शरदचंद्र पवार पक्षाचे शहराध्यक्ष प्रशांत जगताप यांचा दोन्ही राष्ट्रवादी काँग्रेस एकत्र येण्यास विरोध आहे. याबाबत बोलताना धनकवडे म्हणाले, प्रशांत जगताप हे फक्त या शहराचे अध्यक्ष आहेत.मात्र देशाचे अध्यक्ष अजित पवार आणि शरद पवार आहेत.

तसेच खासदार सुप्रिया सुळे या कार्याध्यक्ष आहेत. वरिष्ठ स्तरावर याची चर्चा होऊन निर्णय जाहीर केला केला जाणार आहे. याबाबत सुप्रिया सुळे आणि अजित पवार यांची चर्चा झालेली आहे. त्यानुसार घड्याळ या चिन्हावर पुढील निवडणुका लढवल्या जातील. शरद पवार यांच्या पक्षाचे उमेदवार देखील तुतारी वाजवणारा माणूस या चिन्हावरत निवडणुका न लढवता घड्याळ या चिन्हावरतीच निवडणुका लढवणार आहेत असं धनकवडे म्हणाले.