PMPML Bus Hijack : जंगली महाराज रोडवर भर गर्दीत बस हायजॅक करुन भरधाव पळवली! पुणेकरांनी अनुभवला सिनेस्टाईल थरार

PMPML Bus Hijack : पुण्याच्या गर्दीच्या जंगली महाराज रस्त्यावर एक सिनेस्टाईल थरार पुणेकरांना अनुभवायला मिळाला. मद्याच्या नशेत असलेल्या एका व्यक्तीने पीएमपीएमएल बस थेट हायजॅक करुन भरधाव वेगानं रस्त्यावरून गुडलक चौकपर्यंत पळवली. पण पोलिसांच्या सतर्कतेमुळं आणि झटपट पाठलागाने हा ‘बस हायजॅक’चा ड्रामा अवघ्या काही मिनिटांत संपुष्टात आणला. शनिवारी सायंकाळी साडेपाचच्या सुमारास हा प्रकार घडला.

गर्दीने गजबजल्या रस्त्यावर MH12 YB 5086 क्रमांकाची पीएमपीएमएल बस पुणे महापालिकेच्या जवळील डेंगळे पूल येथील डेपोमधून तुळशीराम राठोड या मद्यधुंद अवस्थेतील व्यक्तीनं कोणाच्याही नकळत हायजॅक केली. नशेच्या जोरावर त्याने बस थेट जंगली महाराज रस्त्याने गुडलक चौकाकडे वळवली. चौकात बस वळवताना मात्र नियंत्रण पूर्णपणे सुटले आणि त्याची ही ‘स्टंट’बाजी लोकांच्या लक्षात आली त्यामुळं एकच खळबळ उडाली.

परिसरातील पोलिसांना संशय आला आणि त्यांनी तत्काळ पाठलाग सुरू केला. सिग्नलजवळ पोहोचताच पोलिसांनी बस थांबवली आणि चालक तुळशीराम राठोड याला जेरबंद केले. चौकशीत आरोपीने बस चोरी केल्याचे कबूल केले. पोलिसांनी बस ताब्यात घेत डेक्कन डेपोमध्ये सुरक्षितपणे परत आणली. आरोपीला डेक्कन पोलीस ठाण्यात दाखल करण्यात आले असून, त्याची वैद्यकीय तपासणी सुरू आहे. सुदैवाने या थरारात कोणतीही जीवितहानी किंवा जखमी झालेलं नाही.

पोलिस अधिकाऱ्यांनी सांगितलं की, “आरोपीच्या संशयास्पद ड्रायव्हिंगमुळं आमचे लक्ष वेधले गेले. आमच्या टीमने अतिशय वेगाने आणि सतर्कतेने कारवाई केली, त्यामुळे मोठा अनर्थ टळला” सध्या पोलिस आरोपीची चौकशी करत असून नेमका हा प्रकार कशासाठी केला? नशेत केला की विशिष्ट उद्देशाने केला याबाबत पुढील तपास करत आहेत.

नेमकी चूक कोणाची?

या बसमध्ये सीएनजी कमी झाला होता म्हणून चालकाने बस डेंगळे पुलावर पार्क केली होती. पार्क केल्यानंतर बसच्या इग्निशन पॉईंटला चावी तशीच ठेवली होती. त्यानंतर पीएमपीएलच्या सिक्युरिटी कर्मचाऱ्यांच्या हलगर्जीपणामुळं अज्ञात व्यक्तीने ही बस चोरून नेली, अशी माहिती मिळते आहे.