Pune Police: पुणे पोलीस आयुक्तांची सर्वात मोठी अपडेट; ज्या निलेश घायवळच्या शोधात पुणे पोलीस, तो लंडनला नाही, तर 'या' देशात!

Pune News : पुण्यातील कुख्यात गुंड निलेश घायवळवर खून, खुनाचा प्रयत्नासह दोन डझनांहून अधिक गुन्हे दाखल असतानाही तो लंडनला पळाला असल्याचं बोललं जात होतं. मात्र, गेल्या वीस वर्षांपासून गुन्हेगारी कारवायांमध्ये सक्रिय असलेल्या घायवळला पासपोर्ट मिळालाच कसा? हा प्रश्न सध्या उपस्थित केला जात असतानाच एक नवीन माहिती समोर आली आहे. निलेश घायवळ हा लंडनला नव्हे तर दुसऱ्याच एका देशात असल्याचं खुद्द पोलीस आयुक्त अमितेश कुमार (Amitesh Kumar) यांनी सांगितले आहे.

निलेश बन्सिलाल घायवळ (वय 45), मूळतः सोनेगाव (अहमदनगर) येथील रहिवासी असलेला हा गुंड, पुण्याच्या कोथरुड परिसरात गेल्या 20 वर्षांपासून दहशत माजवत आहे. त्याने सुरुवातीला गजानन मारणे (गजा मारणे) याच्या टोळीसोबत काम केले, पण नंतर स्वतंत्र टोळी उभी करून पुण्यातील गुंडराज चालवू लागला.

पोलिस रेकॉर्डनुसार, त्याच्यावर खून, खुनाचा प्रयत्न, वसुली, बेकायदा शस्त्रसाठा आणि मारामारीसह 12 ते 24 गुन्हे दाखल आहेत. 2000 ते 2003 या काळात त्याने मारणे टोळीशी वैमनस्य वाढवले, ज्यामुळे पुण्यात अनेक गँगवॉर झाले. 2019 मध्ये जामीन मिळाल्यानंतर तो तुरुंगाबाहेर आला, पण 2023 पर्यंत विविध गुन्ह्यांमुळे पुन्हा अडकला. त्याच्या टोळीने कोथरुडमधील शेकडो गुंडांना सांभाळले असून, परिसरात दहशत कायम ठेवण्यासाठी दरवर्षी नवीन गुन्हे घडवले जातात.

मागील आठवड्यात कोथरुड येथे निलेश घायवळच्या(Nilesh Ghaiwal) टोळीतील गुंडांनी रस्त्यावरील किरकोळ वादातून एका खासगी कर्मचाऱ्यावर (29 वर्षे) गोळीबार केला. यात तो जखमी झाला, तर एका 16 वर्षीय तरुणावर कोयत्याने हल्ला करण्यात आला. या घटनेच्या तपासात घायवळचा मास्टरमाइंड असल्याचे उघड झाले. पोलिसांनी त्याच्यासह आठ साथीदारांवर महाराष्ट्र नियंत्रण संघटित गुन्हे कायदा (मकोका) लावला आहे.

तपासादरम्यान घायवळने आपल्या गुंडांना "टोळीची दहशत कमी होतेय, ती वाढवा" असे आदेश दिल्याचेही समोर आले आहे. त्यामुळे पोलिसांनी 26 सप्टेंबर रोजी घायवळविरुद्ध 'लूक आऊट सर्क्युलर' (एलओसी) जारी केले. त्यापूर्वीच घायवळ लंडनला गेला असल्याचा समोर आला बोल जात होतं . त्याच लंडनला येथे त्यानं आलिशान घर असून. त्याचा मुलगा स्थानिक हायफाय शाळेत शिकत असल्याचेही बोललं जात होत.

मात्र, पोलिसांच्या तपासामध्ये वेगळीच माहिती समोर आली असल्याचं निष्पन्न झाला आहे. या प्रकरणाचा तपास करत असताना निलेश गायवळ याला पुण्यातून नव्हे तर नगर येथून पासपोर्ट मिळाला असल्याचं समोर आला आहे. पोलीस व्हेरीफिकेशनमध्ये तो त्या ठिकाणी उपस्थित नसल्याचे नमूद असताना देखील त्याला पासपोर्ट देण्यात आला असल्याचं देखील तपासात समोर आला आहे. त्यामुळे पोलिसांचा व्हेरीफिकेशन न होता देखील निलेश घायवळ याला पासपोर्ट कोणी मिळवून दिला? यामध्ये कोणी राजकीय हस्तक्षेप आहे का? असा सवाल उपस्थित करण्यात येत आहे.

आतापर्यंत करण्यात आलेल्या तपासामध्ये पुणे पोलीस आयुक्त अमितेश कुमार यांनी सांगितला आहे की निलेश घायवळ हा लंडनमध्ये नसून तो स्वित्झर्लंड येथे असल्याचं समोर आलं आहे आणि त्याचा मुलगा त्याचठिकाणी शिक्षण घेत असल्याचे देखील माहिती अमितेश कुमार यांनी दिली आहे.