NEP Curriculum News: राज्यात नवीन शैक्षणिक वर्षाला सुरुवात झाली असली तरी अनेक शाळांमध्ये विद्यार्थ्यांच्या हातात अद्याप नवीन पाठ्यपुस्तके पोहोचलेली नाहीत. विशेषतः राष्ट्रीय शैक्षणिक धोरण (NEP) अंतर्गत नव्या अभ्यासक्रमानुसार शिकणाऱ्या इयत्ता सहावीच्या विद्यार्थ्यांना पुस्तकांच्या प्रतीक्षेत दिवस काढावे लागत आहेत. यामुळे शैक्षणिक वर्षाच्या सुरुवातीलाच अध्यापन प्रक्रियेवर परिणाम होत असल्याचे चित्र आहे.
यंदापासून दुसरी, तिसरी, चौथी आणि सहावीच्या वर्गांसाठी सुधारित अभ्यासक्रम लागू करण्यात आला आहे. या बदलानुसार नवीन पाठ्यपुस्तके तयार करण्यात आली आहेत. मात्र अनेक भागांत सहावीच्या पुस्तकांचे वितरण अद्याप पूर्ण झाले नसल्याने शिक्षकांना नियोजनानुसार अध्यापन करणे कठीण जात आहे.
बालभारतीकडून मराठी माध्यमाच्या सहावीच्या पुस्तकांचे मुद्रण पूर्ण झाल्याचे सांगण्यात आले असून वितरणाची प्रक्रिया सुरू आहे. प्रशासनाच्या माहितीनुसार, ३० जूनपर्यंत सर्व विद्यार्थ्यांना पाठ्यपुस्तके उपलब्ध करून देण्याचे उद्दिष्ट ठेवण्यात आले आहे.
दरम्यान, पुस्तकांचा तुटवडा भरून काढण्यासाठी महाराष्ट्र राज्य शैक्षणिक संशोधन व प्रशिक्षण परिषद (SCERT) यांनी तयार केलेल्या ‘सेतू पुस्तकां’चा वापर करण्याच्या सूचना देण्यात आल्या आहेत. ही पुस्तके ऑनलाइन उपलब्ध असली तरी त्यांची छपाई आणि विद्यार्थ्यांपर्यंत पोहोचवण्याची जबाबदारी शाळांवर येत असल्याने अतिरिक्त अडचणी निर्माण होत आहेत.
याशिवाय, सेतू पुस्तके प्रामुख्याने मराठी माध्यमासाठी तयार करण्यात आल्याने इंग्रजी, हिंदी आणि इतर माध्यमांच्या शाळांसमोरही प्रश्न निर्माण झाले आहेत. विद्यार्थ्यांना कोणत्या पद्धतीने आणि कोणता अभ्यासक्रम शिकवायचा, याबाबत शिक्षकांमध्ये संभ्रमाचे वातावरण आहे.
पाठ्यपुस्तकांच्या वितरणातील विलंबामागे अनेक कारणे असल्याचे शैक्षणिक क्षेत्रातील सूत्रांचे म्हणणे आहे. चार वेगवेगळ्या इयत्तांसाठी एकाचवेळी नवीन अभ्यासक्रमाची पुस्तके तयार करण्याचे मोठे काम बालभारतीसमोर होते. मूळ मराठी पुस्तकांच्या निर्मितीत झालेला विलंब, त्यानंतरची अनुवाद प्रक्रिया आणि मुद्रणाशी संबंधित तांत्रिक अडचणी यामुळे वितरणाचे वेळापत्रकही पुढे ढकलले गेले.
नवीन अभ्यासक्रमाची अंमलबजावणी प्रभावीपणे व्हावी यासाठी पाठ्यपुस्तके वेळेत विद्यार्थ्यांपर्यंत पोहोचणे गरजेचे मानले जात आहे. अन्यथा शैक्षणिक गुणवत्तेवर आणि विद्यार्थ्यांच्या अभ्यासावर परिणाम होण्याची शक्यता व्यक्त केली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.