Shrirang Barne News : पक्ष फुटला,पण नातं टिकलं; शिंदे गटाचे बारणे अन् ठाकरे गटाच्या उबाळेंची अनोखी 'भाऊबीज'

Pimpri Chinchwad News : शिवसेना फुटल्यानंतर ठाकरे आणि शिंदे गटांतील संघर्ष टोकाला गेलेला असून त्याचा प्रत्यय ऐन दिवाळीत (ता.१०) मुंब्रा (जि.ठाणे) येथे आला. अशा परिस्थितीत सुद्धा या दोन्ही गटांतील दोन मोठ्या नेत्यांनी भाऊबीज बुधवारी साजरी केल्याने तो पिंपरी-चिंचवडमध्ये चर्चेचा विषय झाला.

मावळचे शिंदे शिवसेना खासदार श्रीरंग बारणे (Shrirang Barne) यांनी ठाकरे शिवसेनेच्या पुणे जिल्हा संघटिका (शिरूर) सुलभा उबाळे यांच्या घरी जाऊन आज (ता.१५) भाऊबीज साजरी केली.बहिणीला भाऊबीजेची साडीची ओवाळणी दिली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

बारणे हे थेरगाव,तर उबाळे या यमुनानगर,निगडीत राहतात. शिवसेनेच्या पिंपरी महापालिकेतील गटनेत्या राहिलेल्या उबाळेंचा प्रभाग भोसरी विधानसभा मतदारसंघात म्हणजे शिरूर लोकसभा मतदारसंघात मोडतो.

शिंदे गटात गेलेले शिरूरचे तीनवेळचे शिवसेनेचे माजी खासदार,उपनेते शिवाजीराव आढळराव यांच्या सुलभा उबाळे(Sulbha Ubale) या कट्टर समर्थक समजल्या जात होत्या.तर, मावळचे खा. बारणेंच्या त्या मानलेल्या बहिण आहेत. आजी,माजी खासदार शिंदे गटात गेल्यानंतरही कट्टर आणि आक्रमक शिवसैनिक असलेल्या उबाळेंनी मूळ शिवसेनेतच राहणे पसंत केले.

पक्ष दुभंगल्यानंतर भाऊबीज साजरी करण्याचे बारणे,उबाळेंचे हे दुसरे वर्ष आहे. नमूद करण्याजोगी बाब म्हणजे फायरब्रॅण्ड नेत्या अशी प्रतिमा असलेल्या सौ. उबाळे यांना भाऊ आहे.तसंच खा. बारणेंनाही बहिणी आहेत. तरीही त्यांनी एकमेकांना भाऊबहिण मानलेले आहेत.अपवाद वगळता .२१ वर्षापासून ते भाऊबीजच नाही,तर रक्षाबंधनही नियमितपणे साजरी करीत आहेत.

शिवसेना (Shivsena) दुभंगल्यानंतर हे दोघे दोन वेगवेगळ्या गटात जाऊन एकमेकांचे प्रतिस्पर्धी झाले असले,तरी त्यांनी आपले भावाबहिणीचे नाते जपलेच नाही,तर ते कायम ठेवत वाढवले आहे.त्यामुळेच दोन्ही शिवसेनेतील तीव्र संघर्षाच्या पार्श्वभूमीवर त्यांच्यातील दिवाळी गोडवा तथा भाऊबीजेची चर्चा होत आहे.

(Edited By Deepak Kulkarni)