Malegaon Sugar Factory : ‘माळेगाव’च्या कार्यक्षेत्रात तडजोडीच्या अफवेने नेतेमंडळींची उडाली झोप; ना पॅनेल जाहीर होईना, ना प्रचाराचा नारळ फुटेना!

Malegaon, 06 June : महायुतीमुळे लोकसभा आणि विधानसभा निवडणुकीत एकाच व्यासपीठावर आलेल्या पारंपारिक विरोधकांनी माळेगाव सहकारी साखर कारखान्याच्या निवडणुकीत पुन्हा एकदा परस्पर विरोधात शड्डू ठोकला आहे. उपमुख्यमंत्री अजित पवार यांना चंद्रराव तावरे आणि रंजन तावरे हे ‘माळेगाव’च्या निवडणुकीत आव्हान दिले आहे. मात्र, छत्रपती सहकारी साखर कारखान्याच्या निवडणुकीप्रमाणे ‘माळेगाव’तही विरोधकांशी हातमिळवणी होणार का, याची चर्चा पुन्हा एकदा सुरू आहे. कारण, दोन्ही बाजूंकडून अद्याप ना पॅनेलची घोषणा झाली आहे ना, जाहीर प्रचाराचा अद्याप नारळ फुटला आहे. त्यामुळे वरिष्ठ पातळीवर तडजोड झाली, तर आपल्यावर शाकाहारी हॉटेलात बिर्याणी विकण्याची वेळ येईल, अशी मिश्किल टिपण्णीही कार्यकर्ते करताना दिसत आहेत.

बारामती (Baramati) तालुक्यातील माळेगाव सहकारी साखर कारखान्याच्या निवडणुकीत उमेदवारी अर्ज माघारी घेण्याची मुदत गुरुवारपर्यंत (ता. 12 जून) असणार आहे. म्हणजेच उमेदवारी अर्ज माघारी घेण्यासाठी आता केवळ सहा दिवस शिल्लक राहिले आहेत. माघारीनंतर चिन्ह वाटप होऊन प्रचाराला सुरुवात होण्याची शक्यता आहे. उमेदवारांना प्रचारासाठी आठ दिवस मिळणार आहेत.

दरम्यान, माळेगाव सहकारी साखर कारखान्याच्या निवडणुकीसाठी ((Malegaon Sugar Factory elections)) सत्ताधारी आणि विरोधकांनी उमेदवारी अर्ज भरून दंड थोपटले आहेत. माघारीच्या टप्प्यापर्यंत निवडणूक पोचली आहे. मात्र, दोन्ही बाजूंकडून अद्यापही अधिकृत पॅनेल जाहीर करण्यात आलेले नाहीत. तसेच, प्रचाराचा नारळी अद्याप अधिकृतरित्या फुटलेला नाही.

जाहीर प्रचार नसला तरी सत्ताधारी आणि विरोधक पत्रके घरोघरी वाटप करून प्रचार करत आहेत. तसेच, कोपरा सभा घेणे, असे सध्या सुरू आहे. माळेगावच्या निवडणुकीत श्रेष्ठी पॅनेल जाहीर करीत नाहीत आणि प्रचाराचा नारळ फोडत नाहीत, त्यामुळे कार्यकर्त्यांच्या मनात वेगळा संशय येत आहे. वरिष्ठ पातळीवरून सत्ताधारी आणि विरोधकांमध्ये तडजोड तर सुरू नाही ना, अशी चर्चा माळेगाव कारखान्याच्या कार्यक्षेत्रात सुरू आहे

उपमुख्यमंत्री अजित पवार आणि पारंपारिक विरोधक चंद्रराव तावरे, रंजन तावरे हे लोकसभा आणि विधानसभा निवडणूकीत एकत्र होते. तसेच, नुकत्याच छत्रपती सहकारी साखर कारखान्याच्या निवडणुकीप्रमाणे अजितदादा आणि विरोधकांची हातमिळविण्याची चर्चा तर सुरू नाही ना, अशी चर्चा माळेगावच्या परिसरात आणि बारामती तालुक्यात आहे.

याबाबत राष्ट्रवादी काँग्रेसचे बारामती तालुकाध्यक्ष राजवर्धन शिंदे म्हणाले, माळेगाव कारखान्याच्या निवडणुकीसाठी आमच्या नीळकंठेश्वर पॅनेलची तयारी पूर्ण झाली आहे. घरोघरी जाऊन प्रचार पत्रकांचे वाटप केले जात आहे. उपमुख्यमंत्री अजित पवार हे उद्या (ता. ०७ जून) तालुक्यातील विविध संस्थांच्या पदाधिकाऱ्यांची बैठक घेऊन संवाद साधणार आहेत. तसेच, मळद, गुणवडी आणि डोर्लेवाडी येथे सभांचे आयोजन करण्यात आले आहे. त्यामुळे अफवांवर विश्वास न ठेवता कार्यकर्ते, पदाधिकाऱ्यांनी प्रचारात सहभागी झाले आहेत.

कार्यकर्त्यांची फरपट होऊ देणार नाही

माळेगाव निवडणुकीच्या पार्श्वभूमीवर उपमुख्यमंत्री अजित पवार यांनी थेट आमच्याशी संवाद साधलेला नाही. पण, त्यांचे कार्यकर्ते आणि काही मोजके नेते आमच्या संपर्कात आहेत. तडजोडीबाबतची खदखद असली तरी माळेगाव कारखान्याच्या निवडणुकीत आम्ही कार्यकर्त्यांची फरपट होऊ देणार नाही. कारखान्याची निवडणूक जिंकण्याच्या उद्देशाने आम्ही प्रचार यंत्रणा कामाला लावली आहे, असे रंजन तावरे यांनी स्पष्ट केलेले आहे.