विमानतळ पुन्हा खेडला गेले, तर त्याची जबाबदारी संजय जगतापांची असेल!

गराडे (जि. पुणे) : ‘‘मी आमदार असताना पुरंदरमधील नियोजित विमानतळासाठी पुढाकार घेऊन सर्वपक्षीय बैठक घेतली होती. त्यावेळीसुद्धा संजय जगताप (Sanjay Jagtap) यांनी दांडी मारली होती. निदान आता ते लोकप्रतिनिधी असताना तरी त्यांनी एकमत घडवून आणले पाहिजे. त्यांच्या आडकाठीमुळे पुरंदर विमानतळाचा फुटबॉल झाला आहे. विमानतळ पुन्हा खेडला गेले, तर त्याची सर्व जबाबदारी आमदार संजय जगताप यांची असेल,’’ अशी टीका शिवसेनेचे माजी राज्यमंत्री विजय शिवतारे (Vijay Shivtare) यांनी केली. (Vijay Shivtare criticizes MLA Sanjay Jagtap from Purandar Airport)

वाघापूर (ता. पुरंदर) येथे पिसर्वे-माळशिरस जिल्हा परिषद गटातील शिवसैनिकांच्या मेळाव्याचे आयोजन करण्यात आले होते. या वेळी पुरंदर तालुका शिक्षक सोसायटीच्या नूतन पदाधिकारी व संचालकांचा सन्मान शिवतारे यांच्या हस्ते करण्यात आला. या वेळी शिवतारे बोलत होते.

शिवतारे म्हणाले की, अडीच वर्षांपासून विमानतळाच्या बाबतीत रोज नवीन वार्ता ऐकायला मिळत आहेत. विमानतळ हे फक्त पुरंदर-हवेली नव्हे; तर संपूर्ण पश्चिम महाराष्ट्राच्या विकासासाठी महत्त्वाचे आहे. खेड भागातील सर्व राजकीय लोक विमानतळासाठी एकत्र येऊ शकतात, तर पुरंदर-हवेलीच्या राजकारण्यांना हे का शक्य नाही? पुरंदर तालुक्याच्या सर्वांगीण विकासासाठी प्रस्तावित आंतरराष्ट्रीय विमानतळ हे पुरंदरमध्येच होणे गरजेचे आहे. विमानतळामुळे शेतकऱ्यांच्या प्रगतीबरोबर तालुक्यात औद्योगिक प्रगती वेग घेईल.

या वेळी जिल्हा परिषद सदस्य दिलीप यादव, ज्योती झेंडे, सभापती नलिनी लोळे, माजी सभापती अतुल म्हस्के, युवासेनेचे जिल्हा प्रमुख उमेश गायकवाड, उद्योजक महादेव शिंगाडे, ॲड. नितीन कुंजीर, युवासेना तालुका प्रमुख मंदार गिरमे, बाळासाहेब कोलते, मनोज कुंजीर आदी उपस्थित होते.