ZP President Election: भाजपकडून शिंदेंच्या शिवसेनेचा 'करेक्ट कार्यक्रम', जिल्हा परिषदेत सत्तेपासून ठेवतेय दूर!

BJP politics Maharashtra: महायुतीमधील मित्र पक्ष असलेल्या एकनाथ शिंदेंच्या शिवसेनेला भाजपने जिल्हा परिषदेमध्ये सत्तेपासून दूर ठेवल्याची खेळी खेळत असल्याची चर्चा आहे. शिंदेंच्या सेनेतील नेते त्यामुळे अस्वस्थ असून त्यांनी उपमुख्यमंत्री एकनाथ शिंदे यांच्याकडे या विषयी तक्रार देखील केली आहे.

छत्रपती संभाजीनगरमध्ये शिवसेनेचे सदस्य फोडत भाजपने सत्ता स्थापन केली.तर, परभणीमध्ये ऐनवेळी शिवसेनेला बाजुला ठेवत राष्ट्रवादीसोबत घरोबा करत सत्ता स्थापन केली.त्यामुळे भाजप रणनीती आखत शिवसेनेला सत्तेपासून दूर ठेवत असल्याचे शिवसेनेच्या नेत्यांचे मत झाले आहे.

रायगड जिल्हा परिषदेमध्ये शिवसेना हा सर्वात मोठा पक्ष होता. मात्र, भाजपने येथे देखील शिवसेनेला सत्तेत सोबत घेतले मात्र अध्यक्ष आणि उपाध्यक्षपदापासून दूर ठेवले. केवळ 15 सदस्य असलेल्या भाजपचा अध्यक्ष आणि 16 सदस्य असलेल्या राष्ट्रवादीचा उपाध्यक्ष झाला आणि 21 सदस्य असलेल्या शिवसेनेच्या वाट्याला अध्यक्ष किंवा उपाध्यक्षपद आले नाही. भविष्यात शिवसेनेला हे पद मिळणार का याची देखील स्पष्टता नाही.

साताऱ्यात काय होणार?

सातारा जिल्हा परिषदेमध्ये देखील त्रिशंकु अवस्था आहे. सत्ता स्थापन करण्यासाठी सुरुवातील राष्ट्रवादी काँग्रेस आणि शिवसेनेत चर्चा झाली होती. मात्र, नंतर ही चर्चा काहीशी थंडावली आहे. त्यामुळे महायुती म्हणून तिन्ही पक्ष एकत्र येऊन सत्ता स्थापन करणार असल्याचे सांगितले जात आहे. मात्र, भाजपकडून पुन्हा दगाफटका होण्याची भीती शिवसेनेच्या नेत्यांना आहे. शिंदेंच्या शिवसेनेचे काही सदस्य फोडत सत्ता स्थापनेचा प्रयत्न भाजपकडून केला जाणार असल्याचीही चर्चा आहे.