Delhi Election 2025 : महाराष्ट्रानंतर दिल्ली काबीज करण्यासाठी CM योगी मैदानात; राजधानीत 'बटेंगे तो कटेंगे'ची जादू चालणार का?

New Delhi, 24 Jan : महाराष्ट्र विधानसभा निवडणुकीच्या प्रचारादरम्यान उत्तर प्रदेशचे मुख्यमंत्री योगी आदित्यनाथ यांनी ‘बटेंगे तो कटेंगे’चा नारा दिला होता. त्यांनी दिलेला हा नारा चांगलाच चर्चेत आला होता. विरोधकांनी त्यांच्या या घोषणेवर टीका देखील केली होती. मात्र, या घोषणेचा भाजपसह महायुतीला (Mahayuti) चांगला फायदा झाल्याचं निकालानंतर पाहायला मिळालं.

तर महाराष्ट्रातील प्रचारातील हाच नारा आता दिल्ली विधानसभा निवडणुकीतही भाजपकडून दिला जाणार आहे. कारण योगी आदित्यनाथ (Yogi Adityanath) दिल्ली विधानसभा निवडणूकीच्या प्रचाराच्या आखाड्यात उतरले आहेत. गुरुवारपासून राजधानी दिल्लीत योगी यांच्या सभांना सुरूवात झाली. किरारी येथील सभेतून जनतेला संबोधित करताना त्यांनी भाजपचे उमेदवार बजरंग शुक्ला यांच्या बाजूने मतदान करण्याचे आवाहन केले.

यानंतर ते दुष्यंत कुमार गौतम यांच्या समर्थनार्थ सभा घेण्यासाठी करोलबाग मतदारसंघात आले होते. यावेळी सीएम योगी यांच्या रॅलीतील पोस्टर्स लोकांचे लक्ष वेधून घेत होते. कारण या पोस्टर्सवर 'बटेंगे तो कटेंगे' आणि 'एक हैं तो सेफ हैं' हा भाजपने महाराष्ट्र विधानसभा निवडणुकीत दिलेला नारा लिहिलेला पाहायला मिळालं. त्यामुळे आत योगींचा 'बटेंगे को कटेंगे'चा नारा दिल्लीतही चालणार का? हे पाहणं महत्वाचं ठरणार आहे.

योगींच्या दिल्लीत 14 सभा

सीएम योगी आदित्यनाथ हे पूर्व आणि उत्तर दिल्लीत (Delhi) सभा घेणार असल्याची माहिती आहे. दिल्लीतील मुस्लिम बहुल क्षेत्रात या सभा होणार असल्याची माहिती आहे. यापूर्वी ज्या भागात दंगली झाल्या होत्या त्या भागात 'हिंदू फायर ब्रँड' अशी ओळख असलेल्या योगींच्या सभा होणार आहेत. त्यामुळे योगेंच्या निमित्ताने भाजप दिल्लीत देखील हिंदुत्वाच्या मुद्द्यावर निवडणुकींना सामोरं जाताना दिसत आहे.

दिल्ली विधानसभेच्या 70 जागेसाठी 5 फेब्रुवारीला मतदान होणार आहे. तर 8 फेब्रुवारीला दिल्ली विधानसभेचा निकाल लागणार आहे, त्यामुळे आता आम आदमी पार्टी, काँग्रेस आणि भाजपने आपली ताकद पणाला लावून प्रचारात उतरले आहेत. सध्या दिल्लीत आपची सत्ता असली तरी ही निवडणूक त्यांच्यासाठी सोपी नसल्याच्या चर्चा सुरू आहेत. त्यामुळे दिल्लीचे तख्त कोण राखणार याकडे सर्वांच्या नजरा लागल्या आहेत.