Lok Sabha Election 2024 : लोकसभा विजयासाठी भाजपचा 'मध्य प्रदेश फॉर्म्युला'; 'त्या' 165 जागांवर...

Delhi Political News : आगामी लोकसभा निवडणुकीसाठी भाजपची तयारी अंतिम टप्प्यात आली आहे. गेल्या वर्षी मध्य प्रदेशमध्ये भाजप विधानसभेत पराभूत होईल, असा अंदाज असताना भाजपने तेथे एकतर्फी विजय मिळवला. मध्य प्रदेशमध्ये विजयासाठी जो फॉर्म्युला वापरण्यात आला होता. तोच फॉर्म्युला भाजपकडून आता लोकसभेसाठी देशभर वापरण्यात येणार आहे.

2023 मध्ये मध्य प्रदेश विधानसभा निवडणुकीत भाजपकडून आधीच्या 2019 विधानसभा निवडणुकीत पराभूत झालेल्या जागांवर लक्ष्य केंद्रित करण्यात आले होते. त्यासाठी निवडणुकीच्या दोन महिने आधीच पराभूत झालेल्या 164 जागांवर उमेदवार जाहीर करण्यात आले होते.

त्याचा फायदा भाजपला झाला. आता तोच फॉर्म्युला लोकसभेसाठी वापरण्यात येणार आहे. 2019 च्या लोकसभा निवडणुकीत भाजप ज्या 165 जागांवर पराभूत झाले. त्या जागांवर लक्ष्य केंद्रित करण्यात येणार आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

पराभूत झालेल्या त्या 165 जागांवर आधीच उमेदवार जाहीर करण्याचा भाजपचा प्लॅन आहे. त्यासाठी 30 जानेवारीपर्यंत उमेदवारांची यादी जाहीर केली जाऊ शकते. जर काही अडचणीमुळे यादी जाहीर होऊ शकली नाही, तर फेब्रुवारीच्या पहिल्या आठवड्यापर्यंत यादीला अंतिम स्वरूप देण्यात येईल, अशी माहिती आहे. या पराभूत झालेल्या जागांच्या उमेदवारांच्या निवडी संदर्भातील 60 टक्के काम झाल्याची माहिती आहे.

साधारणपणे मार्च महिन्यात आचारसंहिता लागू होईल. त्यानंतर सर्व पक्षांकडून उमेदवारांची घोषणा करण्यात येईल. त्यामुळे प्रचाराला अवघा एक महिन्याचा कालावधी उमेदवारांना मिळेल. मात्र, भाजपच्या मध्य प्रदेश फॉर्म्युल्यामुळे त्यांच्या 165 जागांवरील उमेदवारांना दोन महिन्यांचा प्रचारासाठी कालावधी मिळेल. त्यामुळे उमेदवाराला जास्तीत जास्त लोकांपर्यंत पोहोचता येईल. आणि उमेदवाराच्या विजयाची संधी वाढेल, अशी शक्यता आहे.