Sanjay Raut in Rajya Sabha : नेहरू तर महान, पण सरदार पटेल यांना पंतप्रधान न बनवून..! राऊतांचा राज्यसभेत जोरदार प्रहार

Nehru Sardar Patel controversy : ऑपरेशन सिंदूरवरील चर्चेदरम्यान शिवसेना उद्धव बाळासाहेब ठाकरे पक्षाचे खासदार संजय राऊत यांनी बुधवारी सत्ताधाऱ्यांवर जोरदार प्रहार केला. सरदार पटेल आणखी दहा वर्षे जिवंत असते तर हे लोक समोर दिसलेही नसते, असा निशाणा राऊतांनी साधला आहे.

राज्यसभेत बोलताना राऊत यांनी केंद्रीय गृहमंत्री अमित शाह यांच्या राजीनाम्याचीही मागणी केली. ते म्हणाले, पहलगाममध्ये 26 लोकांची हत्या कशी झाली, हे सरकार अजून सांगू शकलेले नाही. संपूर्ण काश्मीर गृह मंत्रालयाच्या अंतर्गत आहे. तेथील पोलिस गृह मंत्रालयाच्या आदेशाचे पालन करते. तिथले गव्हर्नरही तुमचे आहेत. त्यांनीही सुरक्षेत चूक झाल्याचे मान्य केले आहे. त्याची जबाबदारी कोण घेणार आणि राजीनामा कोण देणार? पंडित नेहरू देणार की डोनाल्ड ट्रम्प देणार?, असा सवाल राऊतांनी केला.

राजीनामा देशाच्या गृहमंत्र्यांनी द्यायला हवा. ही त्यांची जबाबदारी आहे. या देशात 24 तासांत उपराष्ट्रपतींचा राजीनामा घेतला जातो, कारण ते तुमचे ऐकत नाहीत. पण 26 लोकांची हत्या होऊनही कुणाचा राजीनामा नाही, कुणाची माफी नाही. ही या देशाची स्थिती असल्याची टीकाही राऊतांनी केली.

कालपासून मी राजनाथ सिंग, विदेश मंत्री, नड्डा यांची भाषणे ऐकली. सगळ्यांना पंडित नेहरूंची खूप आठवण येत होती. तुम्ही भूतकाळात खूप फिरतात. पंडित नेहरू त्यांना झोपूही देत नाहीत आणि जगूही देत नाहीत. सरदार पटेलांचीही त्यांना आठवण येते. नेहरू तर महान होते, पण सरदार पटेल यांना पंतप्रधान न बनवून आपण ऐतिहासिक चूक केली, असे राऊत म्हणाले.

नेहरू हे डेमोक्रेटिक होते आणि सरदार पटेल लोहपुरूष होते. त्यांनीच पहिल्यांदा आरएसएसवर बंदी घातली होती. पटेल आणखी दहा वर्षे जिवंत असते तर हे लोक (सत्ताधारी बाकांकडे हात दाखवून) समोर दिसलेही नसते. त्यामुळे तुम्हाला पंडित नेहरूंचे आभार मानायला हवेत. त्यांच्यामुळे तुम्ही इथे बसला आहात. राज्य करत आहात. ही पंडित नेहरूंची मेहरबानी आहे. सरदार पटेल पंतप्रधान असते तर तुम्ही सत्तेतच नाही तर देशातही दिसला नसता, उखडून टाकले असते, असा हल्ला राऊतांनी चढवला.

आपण शस्त्रसंधी केली, त्यातून आपल्याला काय मिळाले. पीओकेवर चर्चा व्हायला हवी होती. किमान मागील 15 वर्षांपासून पाकिस्तानच्या जेलमध्ये कुलभूषण जाधव तिथे आहेत, त्यांची सुटका करायला हवी होती, असे राऊत म्हणाले. पण त्यांचा वेळ संपल्याने माईक बंद करण्यात आला आणि भाजपचे खासदार अशोक चव्हाण बोलण्यासाठी उभे राहिले.