Tahawwur Rana Case : 26/11 च्या मास्टरमाईंडला फासावर लटकवण्यासाठी सरकारचं मोठं पाऊल; नरेंद्र मान यांच्या खांद्यावर जबाबदारी

New Delhi News : मुंबईवरील दहशतवादी हल्ल्यातील आरोपी तहव्वुर राणाला आज (ता. 10) भारतात आणले जाणार आहे. दिल्ली विमानतळावर उतरल्यानंतर त्याला कडेकोट सुरक्षाव्यवस्थेत तिहार जेलमध्ये नेले जाणार आहे. त्याला कठोरात कठोर शिक्षा ठोठवण्यासाठी केंद्र सरकारने मोठे पाऊल उचलले आहे.

तहव्वुर राणा विरोधातील केस पूर्ण ताकदीने कोर्टात लढण्यासाठी सरकारने नरेंद्र मान यांची विशेष सरकारी वकील म्हणून नियुक्ती करण्यात आली आहे. ते राष्ट्रीय तपास यंत्रणेच्या वतीने कोर्टात बाजू मांडतील. या केसमधील डेविड कोलमैन हेडली हाही आरोपी आहे. मुंबईतील दहशतवादी हल्ल्याचे षडयंत्र रचल्याचा दोघांवर आरोप आहे.

राणाला भारतात आणल्यानंतर नरेंद्र मान हे त्याच्या विरोधातील प्रकरणांच्या सुनावणीला दिल्लीतील विशेष न्यायालय आणि संबंधित अपीलीय न्यायालयांमध्ये सरकाराची बाजू मांडणार आहेत. त्यांच्या पुढील तीन वर्षांसाठी ही जबाबदारी देण्यात आली आहे. या केसचा निकाल त्याआधीच लागल्यास तोपर्यंत ही नियुक्ती असेल.

कोण आहेत नरेंद्र मान?

नरेंद्र मान हे प्रसिध्द वकील असून अनेक वर्षांचा अनुभव आहे. त्यांनी सीबीआयसाठी अनेक हायप्रोफाईल केस लढल्या आहेत. त्यामध्ये 2018 च्या कर्मचारी निवड आयोगाच्या पेपर लीक केसचाही समावेश आहे. अनेक केसमध्ये विशेष सरकारी वकील म्हणून यापूर्वीही त्यांची नियुक्ती करण्यात आली होती. यापार्श्वभूमीवर गृह मंत्रालयाने मान यांच्यावर पुन्हा विश्वास दाखवला आहे. 

दरम्यान, मुंबईतील 26/11 च्या दहशतवादी हल्ल्याचा मास्टरमाईंड तहव्वुर राणाला भारतात आणण्यासाठी सरकारकडून खूप प्रयत्न करण्यात आले. त्याला यश आले असून एनआयएचे पथक विशेष विमानाने राणाला भारतात घेऊन येत आहे. आज दिल्ली विमानतळावर हे विमान उतरणार असून त्यासाठी कडेकोट बंदोबस्त ठेवण्यात आला आहे.

राणाला तिहार तुरुंगात ठेवण्यात येणार असून त्यासाठी स्वतंत्र सेल तयार करण्यात आला आहे. तिथेही सीसीटीव्हीसह कडक सुरक्षाव्यवस्था असणार आहे. अमेरिकेतील न्यायालयाने काही दिवसांपूर्वीच राणाच्या भारताला प्रत्यार्पणावर शिक्कामोर्तब केले होते. त्याविरोधात राणाने कोर्टात याचिका दाखल केली होती. पण ती फेटाळण्यात आली.