Waqf Bill Latest Bill : मोठी बातमी : वक्फ विधेयक मंजूर, JPC ने विरोधकांच्या सर्व शिफारशी फेटाळल्या

Waqf Bill Passed: वक्फ संशोधन विधेयकावर संयुक्त संसदीय समितीची सोमवारी बैठक झाली. या बैठकीत 44 कलमांमध्ये सुधारणांवर चर्चा करण्यात आली. समितीतील एनडीएच्या सदस्यांनी सादर केलेल्या सर्व सुधारणा समितीकडून स्वीकारण्यात आल्या. तर विरोधी खासदारांनी सुचवलेली एकही सुधारणा मान्य करण्यात आली नाही.

समितीने विधेयकाला सोमवारी मंजुरी दिली. त्यासाठी समितीमध्ये आज मतदान झाले. सुधारणांच्या बाजूने 16 सत्ताधारी खासदारांनी तर विरोधात 10 खासदारांनी मतदान केले. विरोधी खासदारांनी विधेयकातील 44 कलमांवर आक्षेप घेतला होता. त्यावर जेपीसीमध्ये चर्चा झाली. पण या सुधारणा मान्य करण्यात आल्या नाहीत.      

भाजपचे खासदार जगदंबिका पाल हे समितीचे अध्यक्ष होते. त्यांनी सांगितले की, एनडीएच्या खासदारांनी सादर केलेल्या 14 सुधारणा स्वीकारण्यात आल्या आहेत. तर विरोधी खासदारांनी सादर केलेल्या सर्व सुधारणा फेटाळण्यात आल्या. प्रत्येक सुधारणांवर स्वतंत्र मतदान झाले. आज समितीची शेवटची बैठक होती. जेपीसीचा अंतिम अहवाल 28 जानेवारी रोजी सर्व सदस्यांना दिला दिला जाईल. त्यानंतर 29 जानेवारीला अधिकृतपणे स्वीकारला जाईल.

बैठकीनंतर बोलताना तृणमूल काँग्रेसचे खासदार कल्याण बॅनर्जी म्हणाले, त्यांनी जे आधीच ठरवले होते, तेच केले. त्यांनी आम्हाला बोलण्यासाठीही वेळ दिला नाही. कोणत्याही नियमांचे किंवा प्रक्रियांचे पालन करण्यात आले नाही, असा आरोप बॅनर्जी यांनी केला.

विधेयकावर सुरूवातीपासून वाद

वक्फ संशोधन विधेयक 8 ऑगस्ट रोजी लोकसभेत सादर करण्यात आले होते. त्याला विरोधकांनी जोरदार विरोध केल्यानंतर संयुक्त संसदीय समितीकडे विधेयक पाठवण्याचा निर्णय घेण्यात आला होता. या विधेयकातील प्रस्तावित सुधारणांमुळे मुस्लिम समाजाच्या धार्मिक अधिकारांचे उल्लंघन होत असल्याची टीका विरोधकांकडून केली जात होती. तर या विधेयकामुळे वक्फ बोर्डाच्या कारभारात पारदर्शकता येईल, असा दावा सत्ताधारी खासदारांनी का होता.