Bawankule on Raj Thackeray: शिवसेना-मनसे युतीबाबत राज ठाकरेंच्या संकेतांवर भाजपची पहिली प्रतिक्रिया; बावनकुळे म्हणतात, आम्ही निवडणुका...

Bawankule on Raj Thackeray : महाराष्ट्र नवनिर्माण सेनेचा अर्थात मनसेचा मुंबईत आज कार्यकर्ता मेळावा पार पडला. या मेळाव्यात राज ठाकरेंनी उद्धव ठाकरेंच्या शिवसेनेसोबत जाण्याचे संकेत दिले आहेत. याची अधिकृत घोषणा केलेली नसली तरी त्या दिशेनं पावलं टाकण्याचे आदेशच त्यांनी आपल्या कार्यकर्त्यांना दिले आहेत.

मध्यंतरी त्यांनी दुबेंना संसदेत जाब विचारणाऱ्या काँग्रेसच्या महिला खासदारांचं कौतुक केलं होतं. त्यामुळं राज ठाकरे महाविकास आघाडीसोबत जाण्यासाठी तयार असल्याची चर्चा आता सुरु झाली आहे. यापार्श्वभूमीवर भाजपनं यावर पहिलीच प्रतिक्रिया दिली आहे. मंत्री चंद्रशेखर बावनकुळे यांनी यावर भाष्य केलं आहे.

राज ठाकरे युतीबाबतच विधान?

मनसेच्या मेळाव्यात राज ठाकरेंनी शिवसेना ठाकरे गटासोबतच्या संभाव्य युतीबद्दलही भाष्य केलं. त्यांनी म्हटलं की, “ठाकरेंच्या शिवसेनेसोबत काय करायचं ते माझ्यावर सोडा. मी युतीबाबत योग्यवेळी बोलेन, माझ्या आदेशाची वाट पाहा. तसंच यंदा मनसे १०० टक्के महापालिका निवडणुकीत सत्तेवर येणार आहे. त्यामुळं मतदार यादीवर विशेष काम करा, महापालिका निवडणुकीच्या तयारीला लागा. मुंबई महापालिकेत आपलीच सत्ता येणार असल्यानं आतापासूनच कामाला लागा, अशा सूचनाही त्यांनी केल्या आहेत. कार्यकर्त्यांनी हेवेदावे न करता काम करावं, अशा सूचनाही त्यांनी केल्या आहेत.

भाजपची प्रतिक्रिया

दरम्यान, राज ठाकरेंनी दिलेल्या शिवसेनेसोबतच्या युतीच्या भाष्यावर चंद्रशेखर बावनकुळे नागपुरात पत्रकारांशी बोलताना म्हणाले की, "मी आधीही सांगितलं होतं की राज ठाकरेंना कोणासोबत जायचं? उद्धव ठाकरेंना कोणासोबत जायचं? शरद पवारांना कोणासोबत जायचं हे त्यांचं त्यांना ठरवू द्या. आमचं ठरलं आहे, आमची महायुती ठरली आहे. आमच्या महायुतीत आम्ही निवडणुका लढणार आहोत आणि ५१ टक्क्यांनी तर आम्ही लढाई जिंकणार आहोत"