Congress Maharashtra politics : काँग्रेसच महाविकास आघाडीपासून लांब जाणार; हर्षवर्धन सपकाळांची मोठी घोषणा

Pune News : स्थानिक स्वराज्य संस्थांच्या निवडणुका या कार्यकर्त्यांच्या निवडणुका म्हणून ओळखल्या जातात. त्यामुळे या कार्यकर्त्यांच्या निवडणुकीमध्ये ज्या पद्धतीने लोकसभा आणि विधानसभेला महायुती आणि महाविकास आघाडी झाली तशीच आघाडी खाली होणार का? याबाबत सर्व पक्षांच्या कार्यकर्त्यांमध्ये उत्सुकता आहे.

राज्यात महायुतीमध्ये मुख्य तीन पक्ष एकत्र असले तरी ते तीन पक्ष स्थानिक स्वराज्य संस्थांमध्ये एकत्र येऊन निवडणूक लढणार का? याबाबत साशंकता आहे. तसेच दुसरीकडे महाविकास आघाडीमध्ये फूट पडून ठाकरे बंधू आपली वेगळी युती करून या स्थानिक स्वराज्य संस्थांच्या निवडणुकांना सामोरे जाणार की राज ठाकरे (Raj Thackeray) यांची मनसे महाविकास आघाडीमध्ये सहभागी होऊन या निवडणुका लढल्या जाणार याबाबत अद्याप स्पष्टता आलेली नाही. अशातच काँग्रेसचे प्रदेशाध्यक्ष हर्षवर्धन सपकाळ यांनी मात्र आपली भूमिका स्पष्ट केली आहे.

पुण्यामध्ये आयोजित वार्तालाप कार्यक्रमात हर्षवर्धन सपकाळ बोलत होते. हर्षवर्धन सपकाळ (Harshwardhan Sapkal) म्हणाले, 'महाराष्ट्र पातळीवर महाविकास आघाडी म्हणून कोणतीही युती अथवा आघाडी होणार नाही. युती, आघाडी करण्याचे अधिकार आम्ही स्थानिक संघटनेला दिले आहेत.'

लोकसभा आणि विधानसभा निवडणुकीमध्ये महाविकास आघाडी म्हणून करण्यात आलेल्या वाटाघाटीमध्ये कुठेतरी उणीवा राहिल्या. लोकसभेच्या 48 जागा आणि विधानसभेच्या 288 जागांची वाटाघाटी राज्यपातळीवर केल्यामुळे उणीवा राहिल्या आणि आता जर स्थानिक स्वराज्य संस्थांचा निर्णय घेतल्यास गोंधळ होण्याची शक्यता आहे.

त्यामुळे स्थानिक स्वराज्य संस्थांच्या निवडणुकांमध्ये युती आघाडी करण्याचा सर्वस्वी अधिकार स्थानिक युनिटला आम्ही दिला आहे. युती आघाडी करत असताना कोणत्यातरी पक्षाचे नुकसान होत असते. लोकसभा आणि विधानसभेला महाविकास आघाडी लढल्यामुळे अनेक ठिकाणी आमचा पंजा गायब झाला आहे. त्यामुळे आमचे सिम्बॉल सर्वत्र पोहोचू शकला नाही. त्यामुळे पक्ष कमजोर होत चालला आहे, अशा कार्यकर्त्यांच्या तक्रारी येत आहेत.

विधानसभा आणि लोकसभेला तुम्ही एकत्र लढत असाल तर कार्यकर्त्यांच्या असलेल्या स्थानिक स्वराज्य संस्थांच्या निवडणुकीत एकत्र का लढत नाही? असा देखील प्रश्न उपस्थित करत आहेत. त्यामुळे हा निर्णय स्थायिक पातळीवर घेणे योग्य ठरणार आहे. त्यासाठी आम्ही संघटनात्मक बांधणी केली असून निरीक्षकांची नियुक्ती करण्यात आलेली आहे. जिल्हा पातळीवरील हे निरीक्षक आणि जिल्हाध्यक्ष आणि स्थानिक नेते मिळून त्या ठिकाणी युती आघाडी करायची का नाही याबाबतचा निर्णय घेणार असल्याचे हर्षवर्धन सकपाळ म्हणाले.