Maharashtra Politics : एकनाथ शिंदेंची पक्ष म्हणून राजकीय कारकिर्द येत्या एका महिन्यात संपेल, ठाकरेंच्या वकिलाचा मोठा दावा

 Eknath Shinde News : शिवसेना पक्ष आणि धनुष्यबाण चिन्हाची सुनावणी सुप्रीम कोर्टात सुरू आहे. 20 ऑगस्टला होणारी सुनावणी पुढे ढकलण्यात आली आहे. मात्र, उद्धव ठाकरेंचे वकील असीम सरोदे यांनी ट्विट करत मोठा दावा केला आहे.

सरोदे म्हणाले आहेत की, सर्वोच्च न्यायालयाचे, 'कायद्याचे हात आता महाराष्ट्रातील एकनाथ शिदें यांची पक्ष म्हणून असलेली कारकीर्द येत्या महिनाभरात संपवतील. कुणीही, कसेही, मनमानेल त्या पद्धतीने पक्ष फोडतील, पक्ष पळवतील ही असंविधानिकता आणि पक्षचोरी चालणार नाही असे प्रस्थापित होणे कायद्यावर आणि न्यायव्यस्थेवर प्रेम करणारा म्हणून मला महत्वाचे वाटते.'

'असंविधानिक प्रक्रियेतून सरकार प्रस्थापित करण्यात राज्यपाल पदावरील व्यक्तीने सक्रिय सहभागी घेणे , केंद्रीय निवडणूक आयोगाने कायदाबाहय वागणे आणि विधानसभा अध्यक्षांनी कधीच तटस्थ न वागता बेकायदेशीर सरकार स्थापन करण्यासाठी काम करणे याबाबत सर्वोच्च न्यायालय काय म्हणणार ते सुद्धा मला बघायचे आहे.', असे देखील सरोदे यांनी म्हटले आहे.

कोर्टाकडून तातडीने सुनावणीस नकार

शिवसेना पक्ष आणि चिन्हावर तातडीने सुनावणी घेण्यास सुप्रीम कोर्टाने नकार दिला आहे. 20 ऑगस्टला ही सुनावणी होणार होती. मात्र ती आता पुढे ढकलण्यात आली आहे. त्यामुळे आगामी स्थानिक स्वराज्य संस्थांच्या निवडणुकांआधी यावर सुनावणी होत अंतिम निकाल येणार की स्थानिक स्वराज संस्थेच्या निवडणुकीनंतर येणार याकडे शिवसैनिकांचे लक्ष लागले आहे.

शिंदेंच्या दिल्लीवाऱ्या...

विधीमंडळाच्या पावसाळी अधिवेशनाच्या दरम्यान उपमुख्यमंत्री एकनाथ शिंदे हे दिल्ली दौऱ्यावर गेले होते. त्यानंतर आठ दिवसांपूर्वी ते पुन्हा दिल्ली दौऱ्यावर गेले होते. या दौऱ्यात त्यांनी भाजपच्या मोठ्या नेत्यांची भेट घेतली होती. दरम्यान, या भेटीत त्यांनी वकिलांकडून शिवसेना पक्ष आणि धनुष्यबाण चिन्हा विषयी सुप्रीक कोर्टात सुरू असलेल्या सुनावणीच्या संदर्भात आढाव देखील घेतला होता.